Fiqre Awwal

Aaj Musalmano Ka Haal Ye Hai, Padhe Aur Gour Kare Agar Aysa Hi Raha To Kya Hoga?

 

men-distress

Jumma Wa Edain Ki Namaz Padte Hai Kyuki Hum Musalman Hai, Magar Panj Waqta Namaz Nahi Padte Jo Inse (Jumma aur Edain) Se Ziyada Aham Hai.
Khinzir (Pig) Wa Murdaar Ka Gosht Nahi Khate Kyuki Wo Haram Hai. Jabki Jhoot, Fareb, Gali, Aur Chori, Dhadhi Mundwana Jaise Amal Roz Karte Hai, Jabki Ye Bhi Haram hai.

Quran-e-Muqaddas ko Bade Ahteram Ke Sath Juzdan Me Saja Ke Ghar Ke Tak Me Rakhtey Hai, Kyuki Islami Aqeede Ki kitab hai, Jabki Ek Din Bhi Khol Kar Nahi Padte Aur Padte Hai To Samjhtey Nahi. Aur Samjhey Bagair Padna Nakafi Hai.

Tamam Uloomo Funnun ka Sarchasma Aur Khazana Quran-e-Muqaddas Hai. Ye Hamara Aqeeda Hai. Allama Ibne Arbi (Rehmatullah Alaihi) Ke Qoul Ke Mutabik 77450 Uloom Quran-e-Kareem Me Hai Aur Aala Hazrat Imam Ahmad Raza (Alaihirehman) ki Tehqeeq Ke Mutabik Har Ayaat Ke Andar 60000 Uloom (Subjects) Hai. Jabki Hummey ye Nahi Maloom Hai Ki Allah Ta’ala Surah Fateha Me Humse Kya Farma Raha Hai.

Hamara Dawa Hai ki Hum Maslak-e-Aalahazrat Hi Maslak-e-Auliya, Abdaal, Aktaab, Awtaad Aur Ashabe Rasool ﷺ Ka Maslak Hai. Balki Qabr Me Hone wale (Teesre)³ Sawal Ka Jawab Bhi Maslak-e-Aalahazrat Ki Pairvi Me Hai. Magar Afsos Sad Afsos Hummey Yah Bhi Nahi Maloom Hai Ki Maslak-e-Aalahazrat Hai kya?

Wo Konse Kaam Hai Jinhone Kalam-e-Raza Ko Haq Ki Pehchan Bana Diya, Fatawa Razwiyya Me Aalahazrat (RadiAllah Anhu) Ne Humse Kya Farmaya Hai, Samjhna To Darkinar Hum Padhne Ki Bhi Taqat Nahi Rakhte.

Bas Rasmo Riwaz Ke Bandhan Me Bandh Kar Hum Nikah Karte Hai, Baccha Paida Hota Hai To Azaan Wa Taqbeer Ki Rasam Aada Karte Hai Aur Jab Koi Marta Hai To Namaz-e-Janaza Ke Baad Musalmano Ke Qabristan me Dafn Kar Dete Hai, Isi ka Naam De Diya Islam.

Jabki Islam ki Fitrat me Jiddat Aur Nayapan Hai. Wo Har Zamane Ke Zehno Fiqr Me Uthne Wale Sawalat Ka Jawab Hai, Wah Hummey Dour Ki Zaruriyat Ko Puri Karne Ki Zamanat Deta Hai.

1400 Baras Se Quran Ki Ayat Hummey Awaaz De Rahi Hai. Zamane-e-Mehboob Ki Qasam Yakinan Insan Ghate Me Hai,Magar wo jo Iman laye Aur Achee Aamal Kiye (Al-Qur’an, surah Asr)

Yani Ay Logo ! Kisi Bhi Maidan Me Khasare Se Bahar Aana Chahate Ho To Sabse Phele “Kufr” ko Chodkar Iman Ki Taraf Aao, Buraiya chodkar Nekiya Ikhtiyar Karo, Halate Fisq wa Fujur Aur Allah ta’ala Ki Nafarmani Me Hum Apni Puri Zindagi Bhi Kharch Kar De To Bhi Ek Kadam Aage Nahi bad Sakte.

Shab-e-Qadr Ho Ya Shab-e-Barat Hazaro Ki Tadad Me Nafl Namaze Padkar Allah Ta’ala Ki Bargah Me Niyaze Bandagi Pesh Karke Musalmaan Hone Ka Saboot Dete Hai. Magar Usi Nafl Namaz padne Wale Ke Jimme Saal Bhar Ki Farz Namaze Qaza Hoti Hai, Jisko Ada karna Ab Uske Jimme Farz Hai Aur Farz ke Bagair Nafl Ibadate Kabile Qubool Nahi. Kya Hummey Is baat Ka Ahsas Hai, Ke in Raato Me Nafl Ki Jagah Qazaye Umri Pade.

Saal Bhar Me Ek Raat Shab-e-Barat Me Parwaono Ki Tarah Apne Marhumeen Ki Qabro Par “Fateha” Wa “Isale Sawab” Ke Liye Hazir Hote Hai, Kabhi Kabar Unke Naam Se “Quran Khani” Bhi Karte Hai, Jo Unke Liye Darajaat Buland Hone Ka Zariya Aur Gunaah Maaf Hone Ka Sabab, Isme Koi Shak Nahi. Magar Shaiytan Ka Ye Kitna Bada Dhoka Hai Ke Jab Tak Hum Zinda Rehte Hai Apne “Isale Sawab” Ke Liye Na “Fateha” Na “Quran Khani” Karte Hai Aur Na Namaz Padte Hai. Mazeed Yaha Ki Wahi Marhomeen Jinke Isale Sawab Ke Liye Hum Is Qadar Koshish Karte Hai Ki Raat Ki Tarikhi Me Bhi Qabristan Ka Manzar Kisi Shadi Ki Mehfil Se Kam Nahi Hota. Jabki Jab Tak Wo Zinda Rehte Hai Maa-Baap, Dada-Dadi, Nana-Nani, Bhai-Bahen Aur Dusre Rishtedaaro Ki Shakal Me To Hum Galiya Dete, Marte, Jhagadte Aur Apne Ghar Me Ho To Bojh Samjhkar Marne Ki Tamanna Karte Hai.

Kya Islam Yahi Sikhata Hai ?

Aap sochiye Aur Faisla Kijiye Ki Hummey Kya Kya Karna Chahiye Jo Deen-o-Duniya Me Kamyabi Ka Sabab Ho.
Auliya Allah Ke Mazaro Ki Halaat Aap Ki Nigaho Ke Samne Hai, Mard Wa Aurat Ka Ek Hi Darwaze Se Dakhil Hona Aur Bidh Me Ek dusre Se Dabkar Aaho Baka Karna. (Allahuakbar)

Jis Fitne Se Qoum ko Bachane Ke Liye Hazrat Umar (RadiAllah Anhu) Ne Aurto Ko Namaz Ke Liye Mazjid Me Aane Se Roka Tha, Wahi Fitna Aaj Mazaro Pe Sunni Musalmano ke liye Nasur Ban Chuka Hai, Kyuki Hum Me Koi “Umar” Nahi Hai.

Fasiq Wa Fajir Qawwali Ki Shariyat Par Zaban Darazi Aur Khaas Majlis Me Jahil Peero Ki Manghadat kahaniya, Musalmano Ko Andar Se Khokla Karke Jis Rasm Wa Raah Par Laa Khada kiya Hai, Issey Har Ji Hosh Wa Padha Likha Tabka Achii Tarah Wakif Hai.

Hum Tamam Suuni Musalman Bhaiyo Ki Kamyabi Isi Me Hai Ki Har Kadam Soch Samjhkar Uthaye Aur Apne-Apne Imaan Ki Hifazat kare. Yaha Tak Ke RasoolAllah ﷺ Me Isi Haal Me Mulakaat Ho.