Posted in Uncategorized, Zaruri Malumaat

Anghoti Ke Zaruri Ahkaam

Mard Ko Chandi Ki 1 Anghoti  1 Nag Ki Wazan Me 4½ Mashay ( 4 gm 374 mg) Se Kam Ho, Pehanna Jaiz Hai. [1]

Mard Ke Liye Wohi Anghoti  Jaiz Hai Jo Mardo Ki Anghoti  Ki Tarah Ho Yani Sirf 1 Naginey Ki Ho Aur Agar Usme ( 1 Se Ziyada Ya ) Kai Naginey Hoto

Agarchey Woh Chandi (Silver) Hi Ki Ho Mard Ke Liye Najaiz Hai. [2]

Mardo Ke Liye 1 Se Ziyada (Jaiz Wali) Anghoti  Pehenna Ya ( 1 Ya Ziyadah ) Challey Pehenna Bhi Najaiz Hai Ye (Chilla) Ooghoti Nahi. “Aurte Challey Pehn Sakti Hai. [3]

Mard Ko Sone (Gold) Ki Anghoti  (Ring) Phenna Haraam Hai. Aaqa Huzoor RasoolAllah (Sallallahu Alaihi Wassallam) Nay Sone Ki Anghoti  Pheney Se Mana Farmaya. [4]

Sarkar-e-Do Aalam Noor-e-Mujassam (Sallallahu Alaihi Wasallam) Nay Farmaya- “Lohey ki Unghoti Jahanamiyo Ka Zewar Hai”. [5]

Bagair Naginey Ki Anghoti  Pehenna Najaiz Hai Ki Yeh Anghoti  Nahi Chilla Hai.

Chandi Ka Challa Khaas Libas-e-Zanan (Aurto Ka Pehnawa) Hai , Mardo Ko Pehanna Najaiz Wa Gunaah Hai. [6]

Eidain Me Anghoti  Pehanna Mustahab Hai. (Magar Mard Wahi Jaiz Wali Anghoti  Pehney) [7]

Madina Munawwara Shareef Ya Ajmer Shareef Ke Chandi Ya Kisi Bhi Dhaat Ke Challey Aur Steel Ki Anghoti  Bhi Jaiz Nahi.

Aurat Soney Chandi Ki Jitni Chahe Anghoti  Aur Challey Pehan Sakti Hai, Is Me Wazan Aur Naginey Ki Tadad Ki Koi Qaid Nahi.

Jin Chizo Ka Pehanna Shariyat Me Najaiz Aur Mna Hai, Unko Pehankar Namaz Padna Makhrooh-e-Tehreemi Hai. Aur Us Namaz Ka Iyada (Dohrana) Wajib Hai.

Mard Ko Chandi (Silver) Ki Sirf Anghooti (Ring) Jo 4½ Masha (4.375 Gram) Se Kam Wazan Aur Sirf Ek Nag Ki Jaiz Hai.

Agar Kisi Ne, (ek)¹ Se Ziyada Anghooti Ya (ek)¹ Anghooti Magar 4½ Masha Se Ziyada Wazan Ki, Ya (ek)¹ Se Ziyada Nag Ki Pehankar Ya Sone (Gold) Ki Anghooti Ya Sone Aur Chandi Ki Zanzeer (Chain) Pehankar Namaz Padi To Namaz Makhrooh-e-Tehreemi Hogi. [8]

Agar Lohe, Pital, Tamba, Seesa Wagairah Ke Zewar Pehankar Mard Ya Aurat Kisi Ne Bhi Namaz Padi, To Namaz Makhrooh-e-Tehreemi Hogi. [9]

Yani Aap Ne Najaiz Anghoti  Pehankar Sunnate, Nawafil, Wajib (Witr) Padi Hai Unko Fir Se Dobara Padna Aap Wajib Hai. Aur Bagair Jam’aat Ke Jo Farz Ada Ki Hogi Unko Bhi Dobara Padna Wajib Hai. 

📕[1] Fatawa Razwiya, Jild: 22, Safa: 141 

📗[2] Radh-ul-Mukhtaar, Jild : 9, Safa :597 

📘[3] Bahare Shariyat, Jild :3, Safa : 427 

📙[4] Sahih Bukhari shareef, Jild : 4, Safa : 67, Hadees No°: 5863
📓[5] Tirmizi Sharif, Jild : 3, Safa : 305, Hadees No° : 1792 

📕[6] Fatawa Razwiya Jild: 22 Safa: 130 
📗[7] Bahare Shariyat, Jild: 1, Safa: 779-780 

📘[8] Fatawa Razwiya, Jild: 9, Safa: 56 

📙[9] Fatawa Razwiya, Jild: 9, Safa: 14
          Fatawa Razwiya, Jild: 3, Safa: 422


​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen) 

Advertisements
Posted in Uncategorized, Zaruri Malumaat

Mardo Ko Mehandi Lagane Ka Shar’ee Hukum

Alhamdulillah, Duniya Ke Kone Kone Me Eid-ul-Fitr Ka Jashn Banaya Gaya, Mubarak Baad Ka Silsila Bhi Jari Tha. Bahoot Se Musalman Hazraat Ne Shariyat Ke Dayre Me Rehkar Aur Kuch Ne Shariyat Ke Khilaf Kaam Karke Eid-ul-Fitr Banayi.

Ye Post Likhne Ki Hajat Isliye Pesh Aayi Maine Ye Dekha Ki Bahoot Se Mard8 Hazarat Ke Hath Pair Mehandi Se Rangey Huwe The. Aayiye Dekhte Hai Is Par Shariyat Ka Kya Hukum Hai.

Madine Munawwara Se Bahar Nikalne Ka Hukum—

Hazrate Sayyeduna Abu Hurairah (RadiAllah Anhu) Se Riwayat Hai Ke Nabi-E-Kareem (Sallallahu Alaihi Wasallam) Ke Paas Ek Mukhannas (Hijda) Hazir Kiya Gaya Jis Ne Apney Haath Aur Paaon Mehendi Se Rangey Hue The. 

Nabi-E-Kareem (Sallallahu Alaihi Wasallam) Ne Irshad Farmaya : Is Ka Kya Haal Hai ? (Yani Is Ne Kyun Mehendi Lagayi Hai?) 

Logo Ne Arz Ki : Yeh Auraton Ki Naql Karta Hai. Madani Aaqa (Sallallahu Alaihi Wasallam) Ne Huqm Farmaya Ki

”Isey Sheher Badar Kar Do”
Lihaza Us Ko Sheher Badar Kar Diya Gaya. Madina-e-Munawwarah Se Nikal Kar ”Naqi’aa” Ko Bhej Diya Gaya.

[ 📕Sunan Abu Dawud, Kitab-ul-Adab, Jild: 4, Safa: 368, Hadees 4928]

Pyare Islami Bhaiyon! Dekha Aapne ? Mukhannas Ne Auraton Ki Naql Ki Yani Haath Paaon Me Mehendi Lagayi Toh Hamare Pyaare Aaqa (Sallallahu Alaihi Wasallam) Us Se Kis Qadar Naraz Hue Ki Usey Sheher Badar Kar Diya.

Nabi-e-Kareem (Sallallahu Alaihi Wasallam) Ne Lanat Farmayi—

Hazrat Ibne Abbas (RadiAllah Anhu) Se Riwayat Hai Ki Nabi-e-Kareem (Sallallahu Alaihi Wasallam) Ne Aurto Ke Sath Mushabahat Karne Wale Mardo Par Aur Mardo Ke Sath Mushabahat Karne Wali Aurto Par Lanat Farmayi Hai.

[ 📗Sahih Bukhari, Jild: 2, Kitab-ul-Libaas, Safa: 874] 

Hazrate Sayyeduna Ibne Abbas (RadiAllah Anhu) Se Rivayat Hai Ke Nabi-E-Kareem (Sallallahu Alaihi Wasallam) Ne La’nat Farmayi Janana Mardon Par Jo Aurton Ki Surat Banaye Aur Mardani Aurton Par Jo Mardon Ki Surat Banaye.

[ 📘Al Musnad Al-Imam Ahmad Bin Hanbal, Jild: 1, Safa: 540, Hadees 2263] 

Mehandi Aurten Zeenat Ke Liye Lagati Hai. Jo Mard Mehandi Lagaye Yani Usne Aurto Se Mushabahat Aur Hadees-e-Mubarkah Me Ayse Logon Par Lanat Farmayi Hai.

Najaiz Fashion Kerne Walo Ka Anjaam—

Sarkar-e-Madina, Rahat-e-Qalb-o-Seena (Sallallahu Alaihi Wasallam) Ne Irshad Farmaya :

(Meraj Ki Raat) Me Ne Kuch Mardo Ko Dekha Jin Ki Khale Aag Ki Khenchiyon Se Kati Ja Rahi Thi.

Me Ne Kaha : Ye Kon Hai?

Jibraeel-e-Ameen (Alaihissalam) Ne Bataya : Ye Log Najaiz Ashiya Se Zeenat Hasil Kerte The. Aur Me Ne Ek Badbudaar Garha Dekha Jisme Shor-o-Ghogha Barpa Tha, Me Ne Kaha : Ye Kon Hai?  To Bataya Ye Woh Aurte Hai Jo Najaiz Ashiya Se Zeenat Hasil Kerti Thi.

[ 📙Tareekh-e-Baghdad, Jild: 1, Safa: 415]

Mehandi Bhi Zeenat Ke Liye Hi Lagayi Jati Hai Aur Mehandi Lagana Mardo Ke Liye Najaiz Hai Aur Jo Najaiz Cheezo Se Zeenat Hasil Kare Uska Saza Aap Hazaraat Ne Hadees-e-Mubarkah Ki Roshni Me Padi.
Apne Aap Ko Aashique-e-Rasool Kehlane Walo, Gous-e-Azam Ka Gulam Kehne Walo, Khuwaja Ka Ghada Kehne Walo, In Mubarak Hadees Se Dars Hasil Karein Jo Shadi Ya Eidein Wagairah Ke Mauqey Par Apney Haathon Ya Ungliyon Par Mehendi Laga Liya Karte Hain. 

Shariyat Ka Hukum—

  • Hath Paow Me Balki Sirf Nakhoono Me Hi Mehandi Lagana Mard Ke Liye Haraam Hai.

[ 📘Fatawa Razwiyya, Jild: 9, Safa: 149]

  • Shehzade Aala Hazrat Huzoor Mufti-e-Azam Hind (Rehmatullah Alaihi) Ek Sawal Me Jawab Irshad Farmate Hai :

Mard Ko Hath Paow Me Mehandi Lagana Na Jaiz (Haraam) Hai.

[ 📗Fatawa-e-Mustafaawiya, Jild: 3, Safa: 175]

  • Aurton Ko Hath, Paow Me Mehandi Lagana Jaiz Hai, Lekin Bila Zarurat Choti Bacchiyo (Nabaligh Ladkiyo) Ke Hath, Paow Me Mehandi Lagana Na Chahiye. Badi Ladkiyo Ke Hath Paow Me Mehandi Laga Sakte Hai.

[ 📕Qanoon-e-Shariyat, Jild: 2, Safa: 214]

  • Na-Baligh Ladkey Ko Soney Chandi Ka Zewar Pehanna Haraam Hai Aur Jis Ney Pehnaya Woh Bhi Gunahgaar Hoga. Isi Tarah Bachho (Nabaligh Ladkiyo) Ke Hath Paow Me Bila-Zarurat Mehandi Lagana Najaiz Hai. Aurat Khud Apne Hath Paow Me Laga Sakti Hai, Magar Ladke Ko Lagaye Gi To Gunahgaar Hogi.

[ 📙Durr-ul-Mukhtaar, Jild: 9, Safa: 598]

[ 📗Bahare Shariyat, Jild: 3, Safa: 428]

  • Aurton Ko Haath Paaon Me Mehendi Lagana Jayez Hai. Chotey Bachchiyo (Nabaligh Ladkiyo) Ke Haath Paaon Me Mehendi Lagana Najayez Hai. Bachchiyon (Baligh Ladkiyo) Ko Mehendi Laganey Me Harj Nahi.

[ 📘Durr-ul-Mukhtar, Kitab-ul-Libaas, Jild: 9, Safha: 599]

Al Hasil (Conclusion)—

⊙ Na-Baligh Ladke Ko Bhi Mehandi Lagana Najaiz Hai.
⊙ Mardo Ko Mehandi Lagana Najaiz Wa Haraam Hai.
⊙ Na-Baligh Ladkiyo Ko Bhi Mehandi Lagana Najaiz Hai.
⊙ Aurto Aur Baligh Ladkiyo Ko Mehandi Lagana Jaiz Hai.

​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen)

Posted in Ummat-e-Muslima, Uncategorized

Peeri Mureedi

Kya Hamari Zindagi Ka Yahi “Mission” Hai ?


Peeri Mureedi Ke Silsile Me Hamara Tarz-e-Amal Kya Hai Aur Kya Hona Chahiye !

12 March 2014 Baroz Jumeraat, Mubarakpur, Jila Aazamgarh Me Murshide Girami Huzur Tajjushariya Allama Akhtar Raza Kha Azhari (Dama Zillahu) Tashreef Laye. Jamia Asharafia (World famous Islamic University) Me Aap Ke Istiqbaal Ka Pura Ahtemam Kiya Gaya Tha Lekin Br-waqt Aana Na Ho Saka. Raat Ke Kisi Pahar Me Huzur Hafize Millat Ke Mazar Par Hazri Ke Liye Aana Huwa. Yah Ek Haqiqat Hai Jis Ka Faqeer Gawah Hai.

▫Lekin Is Haqiqat Ko “Social Media” Ke Zariye Se Sunni Halko Aur Hazrat Ke Mureedo Ke Bich Kuch Aysa Pesh Kiya Gaya Hai Jaise Zameen Wa Aasman Upar Niche Ho Gaye. Hindustan Ke Kone Kone Se Phone Karne Walo Ka Ek Silsila Raha Jabki U.P Se Bhi Kayi Logo Ne Phone Kar Ke Baal Ki Khaal Nikalne Ki Koshish Ki Aur Ek-Ek  Nakal Ki Tafseel Janne Ki Khwaish Zaahir Ki,

▪Yah Baat Chunki Direct Hum Se Muta’allik Rahi Is Liye Hum Jante Hai, Warna Har 2 “Programe” Ke Bich Laghbagh Yahi Surate Haal Rehti Hai. Logo Ko Yah Janne Me Bada Maza/Lutf Aata Hai Ki Kisi “Programe” Me Kis Ne Kis Ke Khilaf Kya Bola ? Aur Jab Aysa Waqia Pesh Aa Jata Hai To “Social Media” Ke Zariye Se Duniya Ke Kone Kone Me Jangal Ki Aag Ki Tarah Raat-o-Raat Kaha Ki Khabar Kha Pahuch Jaati Hai.

Ta’ajjub

Kabhi Kabhar Bada Ta’ajjub Hota Hai. Hamari Qoum Apne Mission Se Kitne Door Ho Chuki Hai. Itna Door Ki Shayad Usey Apna “Mission” Malum Bhi Nahi Raha. Mazhab-e-Islaam, Jis Ki Buniyaad Hi Me Yaha Chiz Shamil Rahi Hai Ki Har-Har Chiz Me Mayana Rawi Rakhi Jaye. Oouch-Neech Aur Ifraat Wa Tafreet Ne Agli Ummato Ko Tabah Kar Diya Tha, Isley Hum Inse Bach Kar Chale.

▪Lekin Kya Hum Musalman Zameeni Tour Par Aysa Kar Rahe Hai? Yah Aaj Ka Aysa Sawal Hai Jis Ka Jawab Hummey Zabani Tour Par Dene Ki Zarurat Nahi, Hamari Amli Zindagi Ka Ek-Ek Gosha Is Ka Khamosh Jawab Hai.

▫Islam To Wah Mazhab Hai Jis Ki Taleem Ka Bahut Bada Hissa Yah Hai Ki Ibadat Bhi Utni Hi Ki Jaye Jitni Darmayani ho. Itni Ibadat Karna Ki Kisi Ki Haq Talfi Ho Jaye, Shariyat Me Na Sirf Yah Ki Acchi Nahi Balki Jaiz Bhi Nahi.

Sacche Islam ki Hiqiqi Tasweer


Hazrat Abdullah Bin Amr Bin Aas (RadiAllah Anhu) Se Riwayat Hai, Mujh Se RasoolAllah (Sallallahu Alaihi Wasallam) Ne Farmaya:

🔹”Ay Abdullah! Tumhare Baare Me Mujhe Yah Shikayat Mili Hai Ki Tum Din Bhar “Roza” Rakhte Ho Aur Raat Bhar “Ibadat” Karte Ho, Kya Aysa Hai? Maine Kaha: Haa, Ya RasoolAllah.

🔹Farmaya: Aysa na karo. Balki Kabhi Roza Rakho, Kabhi Na Rakho, Kuch Ibadat Karo Aur Kuch Soo. Kyuki Tumhare Jism Ka Bhi Tum Par Haq Hai. Tumhari Aankho Ka Bhi Tum Par Haq Hai. Tumhari Bibi Ka Bhi Tum Par Haq Hai. Jis Ne Hamesha “Roza” Rakha, Goya Us Ne “Roza” Rakha Hi Nahi. Har Maah (Teen)³ Din “Roza” Rakhna Aysa Hi Hai Jaise Puri Zindagi “Roza” Rakhna. Isley Har Maah (Teen)³ Din “Roza” Rakh Liya Karo. Har Maah (ek)¹ Qur’an Khatam Kar Liya Karo. Maine Kaha: Me Is Se Ziyada Ki Takaat Rakhta Hu.

🔹Farmaya: Agar Aysa Hai To Hazrat Daud (Alaihissalam) Ka “Roza” Rakh Liya Karo Jo Afzal “Roza” Hai Aur Wah Yah Ki (Ek)¹ Din “Roza” Rakho Aur (Ek)¹ Din Na Rakho Aur Har 7 Raato Me (Ek)¹ Qur’an Khatm Kar Liya Karo. Is Se Ziyada Kuch Mat Karna.


[ 📗Sahih Bukhari Shareef ]

[ 📕Sahih Muslim Shareef ]


Dosto

Dosto ! Yah Hai Achee Aur Sachee Islam Ki Sachii aur Haqiqi Tasweer. Kya Aaj Hum Is Meyaar Par Khare Utar Rahe Hai? Kya Aaj Humare Mizaz Me Kisi Ko Manne Ya Na Manne Ke Ta’alluk Se Yah Tasawwurat Hai?

Agar Hummey Jhoot Bolne Ki Aadat Nahi To Shayad “Haa” Ke Rooh Me Is Sawal Ka Hargiz Jawab Na De Paye.

Sare Dast (Ek)¹ Hadees-e-Paak Aur Khayaal Me Rehni Chahiye.

Harzat Abu Huraira (RadiAllah Anhu) Se Riwayat Hai, RasoolAllah (Sallallahu Alaihi Wasallam) Ne Irshad Farmaya:

🔹”Kewal Jum’aa Ke Din Roza Rakhne Aur Kewal Jum’aa Ki Raat Hi Me Ibadat Karne Se Bacha karo”

[ 📙Sahih Muslim Shareef ]


Is Hadees Ki Sharah Me hai-

🔹Khaas Jum’aa Hi Ke Din Roza Aur Kewal Jum’aa Ki Raat Hi Me Ibadat Karna Aur Baki Dino Ko Chod Dena Isley Bura Hai Ki Kahi Jum’aa Ki Azmato Ki Buniyaad Par Usi Tarah Fitno Me Mubtala Na Ho Jaye Jaise Yahoodi, Sanicher (Saturday) Ke Din ki Tazeem Me Mubtala Ho Kar Ghumraah Huwe The.

Shaikh Abdul Haq Muhaddis Dehelvi (Rehmatullah Alaihi) Ne Is Hadees Ke Tahat Jo Likha Hai Us Ki Roshni Me Dekha Jaye To Hamari Shariyat Aur Khud Nabi-e-Paak (Sallallahu Alaihi Wasallam) Ka Mizaz Yahi Tha.

▫Kisi Bhi Chiz Ko Us Ka Haqiqi Makaam Hi Diya Jana Chahiye Aur Kisi Se Bhi Itni Dosti Ya Dushmani Hargiz Nahi Hona Chahiye Jo Gulu Ke Dayre Me Chalee Jaye Ya Dusro Ke Liye Takleef Ka Sabab Ho.

▪Kyuki Aqidat wa Mohabbat ki Yah Hade Hai Aur Jab Koi In Hado Se Aage Badna Chahta Hai To Ho Sakta Hai Us Ka Hashr Wahi Ho Jo Yahoodiyo Ka Hashr Huwa.

RasoolAllah (Sallallahu Alaihi Wasallam) Ka Farman Hai:

🔹Allah ta’ala, Yahoodiyo Par Lan’at Farmaye Jinhone Apne Nabiyo Ki Qabro Ko Masjid Bana Liya.

[ 📘Sahih Bukhari, Kitba: Kitab-us-Salaat ]

Dosto

Duniya Me Bhoot-Parasti Ki Jo Shuruwat Hui, Us Ki Buniyad Bhi Yah Be-Sochi Samjhi Jhooti Mohabbat Bani. Jaisa Ki (Sahih Bukhari, Kitab-Us-Salat) Me Hai.
▪Is Mouke Par In Tamam Bato Ke Pesh Karne Ka Maksad Hai Aaj Ke “Jahil Mureedo” Ko Apne “Peer” Ki Mohabbat Se Gulu Se Bachana. Allah Hifazat Farmaye Kabhi Kabhar To Aysa Lagta Hai Jaise Peer, Peer Nahi Nabi Hai. Balki Agar Sacchi Baat Kehna Jurm Nahi To Hamari Gair Zaruri Mubalga Aameziyo Ki Wajah Se Yah Surat-e-Haal Ho Chuki Hai Ki Qoum Ke Zehno Me Peero Ki Tasweer Unki Apni Haqiqi Wajah Se Kai Guna Badi Ho Chuki. Itni Badi Jo Shariyat Me Kabhi Jaiz Nahi Ho Sakti.

Log Dhadadlle (Bejijakh) “Peeri Mureedi” Dam Bhar Kar Amal (Namaz, Rozo, Naik Amal) Se Koso Door Ho Jate Hai. Balki Ek Zimmedar Aalim-e-Deen Jo Hamare Dost Bhi Hai Unhone Kaha Ki Ek Jahil Ne Un Se Kaha “Rasool Kya Karenge, Peer To Bakhshwainge” (MaazAllah)

▪Hum Ne “Peero” Ka Wah Roop Qoum Ke Samne Pesh Kiya Hai, Jis Se Ek Taraf Beamal Qoum Bad-Amal Ban Chuki Hai To Dusri Aur “Peeri Mureedi” Achii Khasi Tijarati Mandi. Natija Yah Nikla Ki Ayre-Gyre, Chote-Bade, Sacche-Jhoote, Naye-Purane Aur Mourusi Peero Ka Ek Jaal Sa Bich Chuka Hai.

▫Peer Ka Beta Bhale Khair Se (Do)² Lafz Na Pad Paye, Baap Ke Mureedo Ke Nazar Me Kisi Qutub, Gous Se Kam Nahi.Paida Hote Hi Alqab Wa Aadab Aur Naaz Wa Andaz Ke Naye-Naye Tariqe Ijaad Kar Liye Jate Hai.

▪Insan Ki Fitrat Hai Ki Wah Izzat, Doulat Aur Shoharat Haasil Karna Chahta Hai Aur Agar Allah Ka Karam Dastagiri Na Kare To Insan In Chizo ko Hasil Karne Ke Liye Kuch Bhi Kar Sakta Hai.

▫Hazrat Umar Farooq-e-Azaam (RadiAllah Anhu) Islam Ke wah Azeem Mudabbir Hai Jinhone Sab Se Phele Is Fitrat Ko Samjha Aur Apne Dour-e-Khilafat Me Jaleelul Qadr Quraishi Sahaba Ko Bahoot Ziyada Idhar-Udhar Jane Se Baaz Rakha Taki Koi Anhoni Na Ho. Aur Duniya Ne Dekha Ki Hazrat Usmaan Gani (RadiAllah Anhu) Ne Jab Apni Narm Dili Ki Buniyad Par Yah Qaid Utha Di (Idhar-Udhar Jane Diya, Koi Qaid Nahi) To Haqiqat Me Wahi Huwa Jo Farooq-e-azaam Mehsoos Karte The. Aur Anjaam Ke Tour Par Islam Ko Hazrat Usmaan Gani (RadiAllah Anhu) Ki Shahadat Pesh Karni Padi Aur Tabhi Se Hazrat Usmaan Gani Ki Peshgoyi Ke Mutabik Ummat Hamesha Ke Liye Giroh Me Takhseem Ho Kar Raha Gayi Aur Aaj Tak Halaat Bad Se Badttar (Bure Se Bure) Hote Ja Rahe Hai.

Momin Ki Khoobi

Hadees-e-Mubarkah Hai:
“Momin (Ek)¹ Surakh Se (Do)² Baar Nahi Dasa Jata”.

Yani Momin Samajhdar Hota Hai Ki (Ek)¹ Baar Agar Usey Dhachka Lag Chuka Ho To Ainda Ke Liye Wah Sambhal Jata Hai Aur Fir Dhoka Nahi Khata.

▫Lekin Ise Kya Kha Jaye Ki Aaj Ka Momin Dhoke Par Dhoka Khate Hai Aur Fir Bhi Nahi Sambhalte. Iska Saaf Matlab Yah Hai Ki Kahi Na Kahi Hamare Imaan Me Kamzori Hai.

▪Arz Karne Ka Mudda Sirf Yah Hai Ki Koi Bade Se Bada Aalim-e-Deen Ho, Aale Rasool Ho, Peer Ho, Ya Kuch Aur. Sab Ko Un Ka Haqiqi Aur Asli Maqam Hi Milna Chahiye. Kisi Ko Us Ke Asli Maqam Se Ghatana Jis Tarah Jurm Hai, Usi Tarah Kisi Ko Us Ke Maqam Se Badana Bhi Jurm Hai.

▫Koi Peer Kabhi Kisi Nabi Ke Martabe Ko Nahi Pahuch Sakta. Aur Jab Aysa Hai To Peero Ke Sath Nabiyo Wala Sulook Nahi Karna Chahiye, Insano Wala Hi Sulook Karna Chahiye. Isi Me Hamari Zaat Ki Bhi Bhalai Hai Aur Isi Me Hamare Mazhab Ki Bhi.

Andhi Aqeedato

Andhi Aqeedato, Bayan Baziyo Aur Silsilo Ke Jhagdo Ne Hummey Salo Saal Peeche Dhakalne Me Koi Kasar Baki Nahi Chodi Hai, Aur Ab Bhi Agar Rawish Na Badli To Yah Aadat Hamare Liye Kisi Payame Halakat Se Kam Nahi Hogi.

▫Yah Andaz Mohabbat Ke Bajaye Nafrat Ke Jazbaat Ubharta Hai Aur Islam Me Bai’at Ka Silsila Nafrato Ke Liye Nahi, Mohabbato Ke Liye Qayem Kiya Gaya Tha. Goya Humne Apne Tareeqo Se Islam Ke Maqas Ko Bilkul Pase Pusht Daal (Peeth Peeche Daalna, Amal Na Karna) Diya Hai. Kya Hummey Iska Koi Haq Pahuchta Hai ?

▪Yah Sach Hai Ki Humne Jiske Hath Me Hath Diya Wah Hamare Maa-Baap Ki Tarah Hamara Mawa Wa Malja Hai Lekin Kya Iske Zariye Se Dusro Ke Mawa Wa Malja Logo Par Keechad Uchalna Hamare Liye Sahi Hai ? Agar Nahi, Hargiz Nahi, To Yah Aadat Tabdil Hona Chahiye.

Namuna-e-Amal

▫Is Silsile Me Keral Ki Zameen Hamare Liye Namuna-e-Amal Hai. Keral Hindustan Ka Hi Hissa Hai Lekin Wah Mashrabi Aur Khaanqahi Ikhtelaf Ka Koi Guzar Nahi Hota, Kyuki Unhone Apna Ek Dastur Bana Rakha Hai. Wah Apne Aap Ko Kisi Silsile Ki Taraf Mansoob Hi Nahi Karte, Jis Se Yah Pata Chal Sake Ki Yah Fala Silsile Se Juda Huwa Hai.

Kya Hum Sab Bhi Apne Aap Ko Qadri Jaan Kar Aur Maan Kar Is Tarah Ek Nahi Ho Sakte ? Aakhir Tamam Silsile Ki Intiha To Qadriyat Par Hai, Ho Sakte Hai Aur Zarur Ho Sakte Hai, Lekin Us Waqt Jab Hona Chahe. Aur Agar Aysa Nahi Hota Hum Apne Aap Ko Apne Peero Ki Taraf Mansoob Karne Par Ba-Zidd (Adig) Ho Tab Bhi Kam Se Kam Hummey Har Aadmi Ki Izzat-e-Nafs, Maqam Aur Martabe Ka Lihaz Karna Hoga Aur Sab Ko Unka Wajibi Muqam Dena Hoga, Warna Hamara Koi Amal Faide Mand Sabit Nahi Ho Sakta.

Mureed Ka Rawayya

▪Badi Hairat Ki Baat Hai, Har Mureed Apne Peer Ko Wali-e-Kamil Se Kam Darja Dene Ko Tayyar Nahi.  Aur Us Se Badi Hairat Ki Baat Yah Ki Har Peer Apne Mureedo Ki Wajah Se Wali Banta Hai. Khich Taan Kar Jaisi-Taisi, Aadi-Tirchi Bato Se Apni Mohabbat Ka Sikka Bithane Ki Koshisho Ne Aaj Jama’ati Satah Par Hummey Apne Halko Me Mehdood Kar Ke Rakh Diya.

▫Hum Ne Yah Sochna Hi Chod Diya Hai Ki Shakhsiyat Parasti Ke Is Khol Se Bahar Ki Duniya Bhi Koi Duniya Hai. Sabse Ziyada Dukh Us Waqt Hota Hai Jab Peer Sahab Ki Mojudgi Me Allah Wa Rasool Ka Zikr Bhi Dusre Darje Me Chala Jata Hai. Aysa Lagta Hai Peeri Mureedi Hi Hamari Aakhri Manzil Hai Aur Yah Manzil Mil Chuki Hai.

▪Is Mouke Par Zimmedar Ulama Se Yah Guzarish Karna Bhi Hamara “Farz” Hai Ki Aysi Pur Fitan Dour Me Wah Saleh Murshide (Achee Margdarshak Achee Rehnuma) Ke Roop Me Qoum Ke Samne Aaye Taki Qoum Ko Shakhsiyat Parasti Ki Is Ghutan Bhari Fiza (Atmosphere) Ke Alawa, Allah Wa Rasool Ka Haqiqi Paigam Bhi Aam Mil Sake.

Zaalim Log Kabhi Kamyaab Nahi Hote.

Mere Pyare Dosto!
Allah Dilo Ka Hal Janta Hai, Kisi Par Tankeed Ya Kisi Ki Dil Aazari Na Hamara Maqsad Tha Aur Na Hai.

▪Lekin Jo Baat Galat Hai, Us Par Khamoshi Ikhtiyaar Karne Se Wah Sahi Baat Sabit Nahi Ho Sakti Aur Jo Sahi Hai Us Par Khamoshi Usey Galat Nahi Karar De Sakti. Isley Hummey Apna Zawiya-e-Fikr Badalna Hoga Aur Koi Bhi Shakhsiyat Ho Ya Tehreek, Mulk Ho Ya Fiqr Har Ek Ko Uska Asli Maqam Hi Dena Hoga.

▫Kisi chiz ko Hadd Se Bada Dena Istelaah (Termilogy) Me Zulm Kehlata Hai.

Aur Allah Ta’ala ka Farman Hai:

🔹Zalim Log Kabhi Kamyab Nahi Hote.

[ 📙Al Quran, Surah An’aam, Ayat: 21 ]

▪Hummey Chahiye Hum Apne Peero Ki Zaati Aur Niji (Private) Zindagi Par Nazar Rakhne Ki Bajaye Un Ke Paigamo Ko Dil Me Jagah De. Aur Zahir Si Baat Hai Kisi Bhi Sacche Peer Ka Paigam Kisi Na Kisi Roop Me Islam Hi Ka Paigam Hoga Kyuki  Jiska Paigam Islam Ke Muwaafiq Na Ho Wah Peer, Peer Ho Hi Nahi Sakta Isliye,

Hamare Ulama Ne Peer Ki 4 Sharte batlayi Hai:

(1) Sunni Sahi-ul-Aqeeda Ho.

(2) Itna Ilm Rakhta Ho Ki Apni Zarurat Ke Mas’ail Bina Kisi Madad Ke Kitabo Se Khud Nikal Sake.

(3) Fasiq-e-Mo’allin Na Ho (Khullam Khula Gunah Na Karta Ho) .

(4) Uska Silsila Nabi-e-Kireem (Sallallahu Alaihi Wasallam) Tak Pahuchta Ho.

Jo Peer In Par Khara Hai Wah Sachaa Hai Aur Jo In Par Khara Na Utre Wah Hargiz Is Layak Nahi Ki Usey Peer Banaya Jaye. 

​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen)

Posted in Uncategorized, Zaruri Malumaat

Maah-e-Safar Ko Manhoos Janne Ka Sharayi Hukum

🔰 Maah-e-Safar Ko Manhoos Janna—

🔷 Nahoosat Ke Wahmi Tasawwuraat Ke Shikar Log Maah-e-Safar Ko Musibato Aur Aafato Ke Utarne Ka Mahina Samjhtey Hai Khusoosan Iski Ibtidai 13 Tareekhe Jinhe “Terah Tezi” Kaha Jata Hai Bahoot Manhoos Tasawwur Ki Jati Hai. 

❌ Wahmi Logo Ka Ye Zehan Bana Hota Hai Ki Jo Ki Jihalat Wa Ilm-e-Deen Se Duri Ka Nateeja Hai —

• Safar Ke Mahine Me Naya Karobaar Shuru Nahi Karna Chahiye Nuqsaan Ka Khatra Hai,
• Safar Karne Se Bachna Chahiye Accident Ka Andesha Hai,
• Shadiya Na Kare, Bacchiyo Ki Rukhsati Na Kare Ghar Barbaad Hone Ka Imkaan Hai,
• Ayse Log Bada Karobaari Len Dain Nahi Karte,
• Ghar Se Bahar Aamdo Raft Me Kami Kar Dete Hai,
• Is Guman Ke Sath Ki Aafat Nazil Ho Rahi Hai, Apne Ghar Ke Ek-Ek Bartan Ko Aur Saman Ko Khoob Jhadte Hai,
• Is Tarah Kisi Ke Ghar Me Is Maah Me Mayyat Ho Jaye To Manhoos Samajhte Hai Aur Us Ghar Me Apne Ladke Ya Ladki Ki Nisbat Tai Hui Ho To Us To Tod Dete Hai.
• Terah Tezi Ke Unwaan Se Safed Chaney (Kabuli Chaney) Ki Niyaaz Bhi Di Jati Hai.

📝 Note : Niyaz Fatiha Karna Mustahab Wa Ba’ees-e-Sawab Hai Aur Har Tarah Ke Rizqe Halaal Par Har Maah Ki Har Tareekh Ko Fatiha Di Ja Sakti Hai Lekin Ye Samajhna Ki Agar “Terah Tezi” Ki Fatiha Na Di Aur Safed Chaney Paka Kar Taqseem Na Kiye To Ghar Ke Kamane Wale Afraad Ka Rozgaar Mut’aassir Hoga, Ye Sab Be-Buniyad Khayalaat Hai.

🔰 Arbo (Arab Shaharo Me) Me Maah-e-Safar Ko Manhoos Samjha Jata Tha—

▶ Dour-e-Jihalat (Islam Se Pehle) Me Bhi Maah-e-Safar Ke Bare Me Isi Qism Ke Wahmi Khayalaat Rakha Karte The Ki Is Maheene Me Musibate Aur Aafate Bahoot Hoti Hai, Chunanchey.       

🔹”Woh Log Maah-e-Safar Ke Aane Ko Manhoos Khayal Kiya Karte The.”                    [ 📕Aamdat-ul-Qari, Jild: 7, Safa: 110]

🔰 Safar Kuch Nahi—


▶ Hamare Madni Aaqa (Sallallahu Alaihi Wasallam) Ne Safar-ul-Muzaffar Ke Bare Me Wahmi Khayalaat Ko Batil (Jhoota) Qarar Dete Huwe Farmaya :                 

🔸”La safar, Yani Safar Kuch Nahi”                  [ 📗Sahih Bukhari, Kitab-ul-Tibb, Baab-ul-Jazaam, Jild: 04, Safa: 24, Hadees: 5707]  

▶ Muhaqqiq-e-Alal Itlaaq Hazrate Allama Moulana Shah Abdul Haq Muhddise Dehalvi (Rehmatullah Alaihi) Is Hadees Ki Sharah Me Likhte Hai :  

🔹”Awaam Isey (Yani Safar Ke Mahine Ko) Balaao, Hadiso Aur Aafato Ke Nazil Hone Ka Waqt Qarar Dete Hai, Yeh Aqeeda Batil Hai Iski Koi Haqeeqat Nahi Hai”                                [ 📘Ash’aat-ul-Lama’aat, Jild: 03, Safa: 664]                                                                         

▶ Saddrush’Shariya Badruttareeqa Hazrate Allama Moulana Mufti Mohammad Ali Aazmi (Rehmatullah Alaihi) Likhte Hai :                                       

🔹 “Maah-e-Safar Ko Log Manhoos Jante Hai, Usme Shadi Biyaa Nahi Karte, Ladkiyo Ko Rukhsat Nahi Karte Aur Bhi Is Qism Ke Kaam Karne Se Parhez Karte Hai Aur Safar (Travelling) Karne Se Gurez Karte Hai Khususan Maah-e-Safar Ki Ibtidai (Shuruwati) 13 Tareekhe Bahoot Ziyada Manhoos Mani Jati Hai Aur Unko “Tera-Teezi” Kehte Hai, Ye Sab Jihalat Ki Baate Hai, Hadees Me Farmaya Ki “Safar Koi Cheez Nahi” Yani Logo Ka Isey Manhoos Samajhna Galat Hai.                                                                  [ 📘Bahare Shariyat, Jild: 03, Hissa: 16, Safa: 659]

🔰 Koi Din Manhoos Nahi Hota—

▶ Allama Sayyid Mohammad Ameen Bin Umar Abdul Azeez Shami (Rehmatullah Alaihi) Likhte Hai :                         

🔸”Allama Hamid Aafandi (Rehmatullah Alaihi) Se Suwal Kiya Gaya : Kya Baaz Din Manhoos (Ya Mubarak) Hote Hai Jo Safar Aur Deegar Kaam Ki Salahiyyat Nahi Rakhte ?

To Unhone Jawab Diya Ki Jo Shakhs Ye Suwal Kare Ki, Kya Baaz Din Manhoos Hote Hai Uske Jawab Se Ayraaz Kiya Jaye Aur Uske Fel (Amal) Ko Jahalat Kaha Jaye Aur Uski Mazammat Bayan Ki Jaye, Aysa Samjhna Yahoodi Ka Tareeka Hai, Musalmano Ka Shewa Nahi Jo Allah Ta’ala Par Tawakkul Karte Hai.”
[ 📗Tanqeeh-ul-Fatawa Al Haamdi, Jild: 02, Safa: 367]

👉 Islami Bhaiyo! Barkat Wala Aur Azmat Wa Fazeelat Wala To Ho Sakta Hai Jaise Maah-e-Ramzan, Rabi-ul-Awwal, Jumu’aat-ul-Mubarak Wagairah Magar Koi Mahina Ya Din Manhoos Nahi Ho Sakta.

Mir’aatul Manajeeh Me Hai : 

🔹”Islam Me Koi Din Ya Koi Sa’aat (साअत) Manhoos Nahi Haa Baaz Din Ba-Barkat Hai”                                                                             [ 📙Mir’aatul Manajeeh, Jild: 05, Safa: 484]  

Tafseere Ruh-ul-Bayan Me Hai :  

🔸”Safar Wagairah Kisi Mahine Ya Makhsoos Waqt Ko Manhoos Samajhna Durust Nahi, Tamam Awqaat Allah Ta’ala Ke Banaye Huwe Hai Aur Inme Insano Ke Aamal Waqee Hote Hai. Jis Waqt Me Momin Banda Allah Ta’ala Ki Itaa’at Wa Bandagi Me Mashgool Ho Woh Waqt Mubarak Hai Aur Jis Waqt Me Allah Ta’ala Ki Nafarmani Kare Woh Waqt Uske Liye Manhoos Hai. Dar Haqeeqat Asal Nuhoosat To Gunaho Me Hai.  [ 📕Tafseere Ruh-ul-Bayaan, Jild: 03, Safa: 428]

​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen)

Posted in Ummat-e-Muslima, Uncategorized

Aakhir Is Ikhtelaaf Ki Koi Hadd Bhi Hai? 

🔹➖➖➖➖➖➖➖➖➖➖➖➖🔹 “Khuda Ne Aaj Tak Us Qoum Ki Halat Nahi Badli, Na Ho Jisko Khayaal Apni Halat Ke Badalne Ka” 🔸➖➖➖➖➖➖➖➖➖➖➖➖🔸

▫Khawat Mashoor Hai, “Aajiz Billi Kutte Par Hamla Karti Hai”. Ittehaad, Ektaa, Aur Unity Ki Baate Karte Karte Dardmando Ke Gale Khushk Ho Chuke Hai. Kalamkaro Ke Kalam Toot Chuke Hai Aur Kitabo Ke Safahat Bhar Chuke Hai. Par Aysa Lagta Hai, Jaise Yaha Kam Na Hone Ka Hai Aur Na Hoga. Ektaa Ke Dushmano Ne Goya Qoum Ko Is Aag Me Jhonkne Ki Thaan Rakhi Hai. Bhale Uska Nateeja Kuch Bhi Kyu Na Ho.

Abhi Bahoot Jald Jald Kai Ek Bade Bade Shehro Me Musalsal Ayse Waqiyat Pesh Aaye Jin Me “Ulama” Ki Toheen Ki Gai. Kahi Baat Sirf Gali Guftaar tak Rahi Lekin Kai Jagah Wazeh Tour Par Hatha-Pai Aur Zaddo Koob Ki Noubat Aayi. Yah Tareeka Ikhtelaaf Ki Aakhri Hadd Hai Aur Agar Ab In Sab waqiyat Ke Baad Bhi Inkilaab Ki Aahat Nahi Mehsoos Hoti To Fir Qayamat Ka Intezaar Karna Chahiye.

▫Sawal Yaha Hai Ki Aakhir Aysa Kyu Hota Hai Ki Jis Aalim-e-Deen Ne Qoum Ko Salo Apna Khoon-e-Jigar Pilaya Hota Hai, Mouka Aane par Wahi Qoum Uske Is Qadr Khilaf Ho Jati Hai Ki Baat Kaha Se Kaha Pahuch Jati Hai, Jo Khud Us Rahnuma Ke Sath To Door Uske Kisi Kareebi Ke Sath Bhi Nahi Hona Chahiye Tha.

▫Akalmand Aadmi Wah Nahi Hota Jo Is Kism Bato Ke Liye Kewal Ek Pracharak Aur Tamasha Been Bana Rahe, Balki Akalmand Aur Dardmand Wah Hota Hai Jo Is Kism Ke Mu’amalat Ki Tah Me Ja Kar Unke Asli Asbab Ko Janne Samajhne Ki Koshish Kare Aur Qoum Ko Zillat Ke Is Me’ayaar Par Utarne Se Bachaye. Theek Jab Aap Yah Tehreer Pad Rahe Hai, Bataye Kya Is Kism Ke Mu’amalat Ke Baad Hamare Dil Me Yah Khayal Aata Hai?

Agar Nahi, To Hummey Apni Akalmandi, Dardmandi, Samajhdari, Insaniyat Aur Akhlaqi Kadro Ka Jaiza Lena Chahiye.
▫Yah Baat Hamesha Hashiya-e-Khayal Me Rehni Chahiye Ki Is Kism Ke Waqiyaat Chand Ghanto Ki Fikr Ki Den Nahi Hoti, Balki Muddato Ki Dushmani Ya Nasamjhi Ka Nateeja Hote Hai.

Bhala ! Jis Imaam Ki Iqtida Me Humne Apne Sab Se Aham Farz Namaz Ka 1-1 Rukan Ada Kiya, Kya Mamooli Mamooli Bato Ki Buniyad Par Usi Azeem Rehnuma Par Hum Hath Utha Sakenge?

Yah Baat Jisey Humne Mamooli Baat Kaha Hai, Zarur Koi Gair Mamooli Baat Hogi, Kyuki Mamooli Bato Ki Buniyaad Par Aysa Nahi Huwa Karta. Bhala Hummey maloom Na Ho Lekin Koi Na Koi Aham Wajah Zarur Rahi Hogi. Pehle Warsho Tak Lawa Pakta Hai Tab Kisi Din Phatta Hai.

Ek Suwal : Is Mouke Par Sochne Ki Ek Dusri Baat Yah Bhi Hai Ki Aakhir Kisi Na Kisi Tarah Se Har Har Aalim-e-Deen Kyu Mohtaaj Feeh ( Jhagadne Ki Wajah) Bam Jata Hai?

Yah Wah Sawalat Hai Jo Hum Me Se Har Ek Sahib-e-Fikr Wa Baseerat Se Jawab Ka Mutalba Karte Hai.

▫Dosto ! Baat Der Asal Yah Hai Ki Humne Kisi Na Kisi Jehat (Direction) Se Apna Ahsas Khoo Diya Hai Aur Aaj Usi Ka Khamyaza Bhugatna Pad Raha Hai. Aam Tour Par Kisi Bhi Insan Ko Apni Badi Se Badi Khami Bhi Nazr Nahi Aati Aur Wah Apni Tamam Tar Khamiyo Ka Dhindora Dusro Ke Sar Fodna Chahta Hai Jabki Theek Yahi Surte Haal Dusre Ke Sath Bhi Pesh Aati Hai Ki Wah Bhi Apni Koi Khami Nahi Dekhta Balki Apne Hareef Hi Ko Tamam Buraeyyo Ki Jad Janta Hai.

▫Halanki Sach Yaha Hai Ki Dono Hi Haq Par Nahi. Kyuki Na Koi  Aadmi Sarapa Aib Hota Hai Na Hi Koi Mujassam Kamalat Ka Majmoo’aa. Insaaf Pasandi, Ilm, Deendari Aur Akalmandi Ka Takaza Yah Hota Hai Ki Insan Halka Sa Kadam Fisaltey Hi Apni Kotahiyo Ka Ahsaas Kare Aur Aaeinda Ke Liye Itna Choukanna Ho Jaye Ki Fir Kabhi Bhool Kar Bhi Kadmo Me Lagjish Na Paida Hone Paye.
Isi Baat Ko Hadees Ki Zaban Me Kahe To Kuch Yoo Bhi Kah Sakte Hai :

“Momin Ko Ek Suraakh Se (Do)² Baar Nahi Dasa Jata Hai”


▫ Hamara Almiya Yahi Hai Ki Hum Apna Saccha, Sahi, Ilmi, Deeni, Akhlaaqi Aur Samajh Darana Jaiza Lene Ki Bajaye Poora Nazla Dusro Par Utarne Ka Jazba Rakhte Hai Aur Saari Koshish Apne Aap Ko Farishta Sabit Karne Par Kharch Karte Hai Jabki Agar Wahi Koshish Apni Zaat Ki Islaah Ke Liye Ho To Shayad Nateeja Itna Accha Ho Ki Aaienda Koi Anhoni Ho Hi Na Sake.

▫Agar Awaam Aur Ulama Sab Apne Apne Daero Me Rah Kar Apni Mukammal Deeni Zimmedariya Nibhaye. Awaam, Ulama Ko Nabi Ka Naeeb Samjhe Aur Ulama Hiqmat Se Kaam Lete Huwe Tableeg-e-Deen Me Masroof Rahe To Kya Majaal Ki Jhagade Panap Sake.

Lekin Allah Hifazat Farmaye Hamari To Uthaan Hi Ikhtelaaf, Group Bazi Aur 1½ Inch Ki Nayi-Nayi Masjido Se Hoti Hai.

▫Is Waqt Jo Halat Hai Un Me Ek-Ek Kalima Padne Wale Ko Allah Rabbul Izzat Ne Aysa Sunhara Mouka Ata Farma Rakha Hai Ki Shayad Itna Sunhara Mouka Pehle Kisi Qoum Ko Na Mila Ho. Lekin Badi Hairat Hai Ki Ayse Saajgaar Mahool Me Bhi Yaar Log Apni Fikr Ka Zra Istemaal Nahi Karte. Wahi Be-dhangi Chaal, Wahi Ghisaa Pita Andaaz Wahi Purani Fikr Aur Nateejan Wahi Purani Rawish.

Zara Aankhe Khol Kar Dekhe! Kya Aaj Siyasat Ka Poora Maidan Musalmano Ko Chikh Chikh Kar Nahi Bula Raha Hai?

Ek Samajhdar Chahe Toh Is Jamhoori Mulk Me Kaisi Pakiza Aur Kamyaab Siyasat Kar Sakta Hai. Lekin Kya Aisa Hai?          

Hamare Bhai Log Apni Gaaliyo Aur Apne Hi Bhaiyo Ke Khilaaf Toh Har Kism Ki Razeel Se Razeel Siyasatey Karne ke Liye Tayyar Hai, Lekin Mulki Aur Qoumi Satah Par Poore Musalmano Ki Saleh Aur Sahi Qayadat Ke Liye Aage Aane Ko Koi Tayyar Nahi.
▫Bilkul Yahi Surate Haal Daawat Wa Tableeg Ke Maidan Ki Hai. Ek Muballig Aur Daayi Ke Liye Aaj Mahoul Kis Kadar Hamwaar Hai, Is Ke Liye Ek Ba-zaabta Mazmoon Ki Zaroorat Hai.

Zara Itna Toh Soche! Kaha Wah Zamana Tha Jab Khud Nabi-e-Kareem (Sallallahu Alaihi Wasallam) Ki Zaat-e-Waala Sifaat Ko Ayn Haalat-e-Namaz Me Sataya Jata Tha Ki Oont Ki Ojhdi La Kar Aap Ki Pusht-e-Mubarak Par Rakh Di Jaati Thi Or Kaha Aaj Ka Zamana Ki Agar Kisi Sanghi Se Sanghi Kaafir Ke Paas Khade Ho Kar Bhi Namaz Padhi Jaye Toh Adab Ke Saath Haath Baandh Kar Khada Ho Jata Hai Aur Namazi Ke Aage Se Guzarne Ki Himmat Nahi Karta Balki Jab Tak Namaz Mukammal Na Ho Jaye Takta Rehta Hai. Itna Hi Nahi Ayse Shakhs Ko Ek Saccha, Pakka Aur Imandaar Musalman Samajh Kar Ahtiraam Ki Nigaah Se Dekhta Hai.

Kya Is Kadr Badle Huye Mahaul Me Tableeg Ka Kaam Aasaan Se Aasaan Tar Nahi Ho Gaya Hai?


Lekin Sacchai Aur Imandaari Ke Saath Apne Gireebaan Mai Jaankh Kar Dekhiye Kya Aaj Kahi Bhi Aise Logo Tak Ja Kar Koi Islam Ka Paigam Pahuchane Wala Hai?
▫Social Media, Print Media Or Electronic Media Ne Aaj Kya Kya Aasaniya Nahi Paida Kar Rakhi Hai, Lekin Inka Kitna Sahi Istemaal Ho Raha Hai Aur Kitna Galat, Yaha Kisi Bhi Daanishwar Se Chupa Nahi Hai. Hadd Toh Yaha Hai Dusro Tak Apna Paigam Pahuchane Ke Liye Kya Istemaal Kare, Agar Apni Zaat Ki Islaah Ke Liye Bhi Sahi Istemaal Kar Le Toh Naksha Badal Jaye, Lekin Waah Re Hasrat! Aisa Bhi Nahi Ho Raha Hai.
Aam Musalmano Ke Liye Is Sey Ziyada Accha Mouka Aur Kya Ho Sakta Hai Ki Wah Jamhooriyat Ka Poora Faida Uthaate Huwe Apne Gali Mohallo Se Lakar Offices Tak Aur Padosiyo Se Kar Dosto Tak Jis Andaaz Aur Jis Aasani Se Chahe Islam Ka Saccha, Dil Me Utarne Wala Aur Natural Paigam Ghar-Ghar Aur Dar-Dar Aam Kar Sakte Hai.

Lekin Aakhir Aarzoo’o Se To Aysa Hone Se Raha, Kare Kon?

Jis Qoum Ko Apno Ki Ladai Aur Gairo Ki Chaplosi Se Fursat Nahi, Wah Is Qadr Baland Fiqr Kab Ho? Jisey Kewal Yah Takeedey Karna Aata Ho Ki Hamare Imaam Sahab Ka Aaj Musalley Par Pehle Baya (Left) Kadam Pahucha Tha, Wah Is Qadr Baland Fiqr Kaise Ho Sakti Hai.
Mere Dosto! In Talkh Baato Ka Maqsad Sirf Hamari Fiqr Ko Bedar Karna Hai Aur Kaam Ka Aadmi Banana Hai. Yaad Rakhe Jo Qoum Be Hiss Ho Chuki Hoti Hai, Uski Zindagi Zindagi Aur Jeena Jeena Nahi Hota. Jo Qoum Aapas Me Ladne Lagti Hai, Wah Qoum Tarakki Yafta Hona To Door, Tarakki Ka Koi Mansooba Bhi Nahi Bana Pati.

Kya Aaj Hamari Halat-e-Zaar Bilkul Yahi Nahi?

Sochiye, Baar-Baar Sochiye, Thandey Dil Se Sochiye, Huzoor Ki Ummat Ka Dard Seene Me Basa Kar Sochiye Aur Agar Yahi Sacchai Hai To Fir Apni Zimmedariyo Ka Ahsas Karte Huwe Qoum Ko Khawab-e-Gaflat Se Bedar Karne Ki Har Mumkin Koshish Kijiye, Kyuki Ek Musalman Hone Ke Naate Yah Aap Ki Apni Zimmedari Hai. 

▫Iske Liye Sabse Pehle Apni Safo Me Ittehaad Paida Kijiye. Dil Bada Karke Apne Aapsi Jhagdey Khatam Kijiye Aur Fir Poori Qoum Ko Ek Karne Ke Liye Har Jatan Kijiye. Iske Liye Apne Deeni Rahnumao Se Jud Kar Kaam Kijiye Kyuki Deen Se Badi Is Qainat Me Koi Cheez Nahi. Aur Deeni Rahnuma Hamare Liye Wahi Haisiyat Rakhte Hai Jo Maddi Zindagi Me Maa-Baap. Namazo Aur Masjido Ko Kewal Kandho Se Kandhe Milne Milane Ka Sabab Na Jane, Yah Masjide Aur Namaze Bade Se Bade Inkilaab Ki Jaan Sabit Ho Sakti Hai.
▫Aakhir Nabi-e-Kareem (Sallallahu Alaihi Wasallam) Ka Poora Nabvi Inkilaab Masjid-e-Nabvi Hi Ki To Den Hai. Usi Masjid Se Namazi Aur Quran Ke Tali Taiyaar Ho Rahe Hai To Usi Se Quran Ke Mu’allim Bhi. Usi Se Khalifa Bhi Taiyaar Ho Rahe Hai Aur Usi Se Arab Ki Sarhado Se Lakar Ajam Ke Gosho Tak Ki Sarbarahi Karne Wale Qaideen Bhi.

• Kya Masjide Kal Ki Tarah Aaj Bhi “Allah” Ke Ghar Nahi?

• Kya Hum Bhi Usi Nabi Ka Kalima Padne Wale Nahi Jis Ka Kalima Sahaba-e-Kiraam Padte The?


• Kya Hamari Namazo Ka Andaaz Bhi Wahi Nahi, Jo Unki Namazo Ka Tha?


▫Agar Sab Kuch Wahi Hai To Fir Kami Kis Cheez Ki Hai? Kami Hai Yakeen Aur Pukhta Imaan Ki. Apna Imaan Mazboot Rakhiye Aur Fir Dekhiye Hum Bhi Wahi Sab Kuch Kar Sakte Hai Ho Hamari Ideal Hastiya Ne Kiya Tha. Bas Hummey Yaha Azm Karna Hai Ki Hummey Apne Ideology Ko Sahi Tour Par Follow Karna Hai.

To Kya Hum Iskey Liye Tayyar Hai ? 

​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen)

Posted in Ummat-e-Muslima, Uncategorized

Muslim Aurto Ke Ta’alluk Se Ek Baar Fir Chetawni

🔹➖➖➖➖➖➖➖➖➖➖➖➖🔹 
“Kya Islam Par Ayteraaz Karne Wale Muslim Ya Gair Muslim Ya Media Wale, Talaaq Ke Ta’alluk Se In Tafseelat Se Waqif Hai ?          🔸➖➖➖➖➖➖➖➖➖➖➖➖🔸

Mahanama “Ahsas” January 2016 Ke Idariye Me Hum Ne Ek Azeem Fitne Ko Bhapte Huwe Likha Tha :

“Muslim Mahilao Par Sankat Ke Badal” Idhar Hum Yah Likh Kar Farigh Huwe, Udhar 3-4 Din Baad Humey Apna Andesha Dekhne Ko Mil Gaya, Yah Afsos Naak Khabar Mili Ki Kashmir Me 40 Aurto Ne Apne Shoharo Ko Talaaq Di Hai. Humne Jin Haqeeqato Ka Inkishaaf (Khulasa) Kiya Tha Aur Fir Jin Khatraat Ki Nishandehi Ki Thi, Unki Tafseelat Ke Liye January 2016 Ka Wah Idariya Zarur Padhle.

▪ Hum Ek Baar Fir Poori Millat (Qoum) Ko Yah Chetawni Dena Apna Farz-e-Mansabi Samajhte Hai Ki Muslim Bacchiyo Ke Imaan Ko Garat Karne, Unki Ijaazat Ko Taar-Taar Karne Aur Sharm Se Poori Islami Duniya Ka Sar Jhukane Ke Liye Sanghi Takato Ne Is Baar Jo Ghinouna Daw-Pech Khelne Ka Irada Kiya Hai, Wah Itna Bhayanak Hai Ki Iska Asar Bahoot Jald Failega, Bahoot Door Tak Jayega Aur Bahoot Der Tak Rahega.
▫ Meri Muraad Hai Aazadi Aur Taraqqi Ke Naam Par Muslim Aurto Ko Bilkul Be-Haya Aur Hadd Se Siwa Aazad Bana Kar Unka Bharpoor Misuse Karna Aur Emotional Blackmail Karna.

Talaaq Ka Power Mardo Hi Ke Paas Kyu, Aurto Ke Paas Kyu Nahi ?


Teen³ Talaaq Ka Tasawwur Kyu ?


Ek Mard Ko Chaar Shadiyo Ki Ijaazat Hai To Aurat Ko Kyu Nahi ?

▪ Yu Hi Mehar Aur Khula Wagairah Ke Ta’alluk Se Bhi Ajeeb Ajeeb Qism Ke Zabardasti Ke Ayterazat Ka Ek Tomar (Bahoot Ziyada) Hai, Jo Padhi Likhi Muslim Bacchiyo Ke Zehan Wa Dimag Me Thope Ja Rahe Hai Aur Unhe Yah Ta’assur (Effectiveness/Asar Qubool Karna) Diya Ja Raha Hai Ki Islam Ne Un Par Zulm Kiya Hai. Hairat Hai Yah Baate Wo Log Kar Rahe Hai Jinka Apna Dharmik Wajood Khokhla Hai.

▫ Lekin Baat Darasal Insaniyat, Huqooq Ya Insaf Ki Hai Hi Nahi, Baat To Kam Zarf  (Salahiyat) Qism Ki Muslim Bacchiyo Ka Shohand (शोषण) Karne Ki Hai. Warna In Tamam Ayterazaat Ka Ek Hi Jawab Kafi Hai, Ye Tamam Masail Wa Mu’aamlaat Aurto Aur Mard Ki Shareerik Banawat, Taqat, Aqal, Sahaaliyat Aur Psychology Ke Aytebaar Se Hai.

Kya Jis Tarah Mardo Ke Paas Talaaq Ka Power Hai, Aurto Ke Paas Khula Ka Haq Nahi ?

▪ Kya Aurat Natural Tour Par Jazbaati Nahi Hoti, Ki Agar Uske Paas Talaaq Ka Power Hota To Rishte Nibh Hi Nahi Pate, Balki Kuch Kuch Mard Bhi Agar Jazbaati Hote Hai To Rishto Me Daraad Paida Ho Jati Hai, Jabki Mard Jazbaati Hone Ke Bawajood Aurat Ki Ba-Nisbat Kafi Kam Jazbaati Hota Hai.

▫ Kya Islam Ne Direct Teen³ Talaaq Ka Ikhtiyaar Diya Hai ? Nahi, Ek Mard Ko Ek Aurat Se Shadi Ke Badle Kul Teen³ Talaaq Ka Power Milta Hai, Jisey Poori Zindagi Use Karna Hota Hai, Agar Koi Ek Talaaq De Deta Hai, To Ab Aage Ke Liye Sirf Do² Talaaq Ka Malik Rah Jata Hai Aur Do² Deta Hai To Ab Sirf Ek¹ Talaaq Ka Malik Reh Jata Hai.

▪ Jabki Ek Sath Teen³ Talaaqe Dene Ko Shariyat-e-Islamiya Nafiz To Manti To Hai (Talaaq Ho Jati Hai) Lekin Haraam Janti Hai. Agar Talaq Dene Ki Noubat Aa Jaye To Ek¹ Talaaq De, Ziyada Kuch Ho Jaye To Majboori Me Do² De De.

▫ Ek Baat Yah Bhi Hai Talaaq Aakhri Hathiyar Hai, Pehle Samjhana Hai, Fir Bister Alag Karna Hai, Fir Halki-Fulki Adab Sikhane Ke Liye Zad-Koob Hai, Fir Dono Gharo Ke Pancho Ki Taraf Se Samjhane Ka Marhala Hai Aur Jab Ye Tamam Hathkande Fail Ho Jaye To Ab Ek¹ Talaaq Hai.

Kya Islam Par Ayteraaz Karne Wale Muslim Ho Ya Gair Muslim Ho Ya Media Wale, Talaaq Ke Ta’alluk Se In Tafseelat Se Waqif Hai ? 
Agar Nahi Aur Zaruri Nahi To Kya Jihalat Ke Ba-Wajood Kisi Par Keechad Uchalne Ka Kisi Ko Koi Haq Hai ?

▪ Theek Yehi Surte Haal Aur Itna Hi Dam-Kham Mard Ki 4 Shadiya Aur Aurat Ki 1 Shadi Wale Ayteraaz Me Hai. Jab Paida Karne Wale Ne Ek Aurat Me Itni Takat Paida Hi Nahi Ki Aur Uska Nature Aysa Na Banaya Ki Wah Ek Waqt Me Kayi Shoharo Ke Tahat Rah Sake To Fir Kya Yah Ayteraaz Nature Se Bagawat, Bokhlahat Aur Hatt Dharmi Nahi ?

✍ Mufti Khalid Ayoob Misbahi

[ Chief Editor Of Mahanama Ahsas & Sunni Darul Ifta, Surajpol, Jaipur]                           [📘 Mahanama Ahsas, Apr/16, Safa: 06-07]



Shariyat Me Kisi Bhi Qism Ki Tabdeeli Nahi Ki Ja Sakti.

❌”I Reject Uniform Civil Code, I Do Not Want Any Changes In Muslim Personal Law”


❌”Me Uniform Civil Code Ko Kharij Karta Hu, Me Muslim Personal Law Me Kisi Qism Ki Tabdeeli Nahi Chahta.”


❌”मैं समान नागरिक संहिता को अस्वीकार करता हु, मैं मुस्लिम पर्सनल लॉ में किसी भी प्रकार का परिवर्तन नहीं करना चाहता.”

​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen)

Posted in Uncategorized, Zaruri Malumaat

Sajda-e-Tilawat Ki Fazeelat Aur Ahkam

🔰 Sajda-e-Tilawat Aur Shaitaan Ki Shaamat —

Nabi-e-Kareem (Sallallahu Alaihi Wasallam) Ka Farman-e-Jannat Nishaan Hai :

🔹”Jab Jab Aadmi Aayat-e-Sajda Padh Kar Sajda Karta Hai, Shaitaan Hat Jata Hai Aur Ro Kar Kehta Hai, Haay Meri Barbadi ! Ibne Aadam Ko Sajde Ka Hukum Huwa Usne Sajda Kiya Uske Liye Jannat Aur Mujhe Hukum Huwa Me Ne Inkar Kiya Mere Liye Dozakh Hai”.

[ 📕Sahih Muslim, Jild: 1, Safa: 61]

(InshaAllah) Har Muraad Poori Ho—

▶ Jis Maqsad Ke Liye Ek Majlis Me Sajde Ki Sab (Yani 14) Aayate Padh Kar Sajda Kare Allah Ta’ala Uska Maqsad Poora Farma Dega. Khwah Ek Ek Aayat Padh Kar Uska Sajda Karta Jaye Ya Sab Padh Aakhir Me 14 Sajde Karle.

[ 📘Durr-ul-Mukhtaar, Jild: 2, Safa: 719]      [ 📙Ghunyah, Safa: 507]


🔰 Sajda-e-Tilawat Ka Shar’ee Hukum—


  • Sajda-e-Tilawat Ki Tareef

      ⏩Quran-e-Paak Me 14 Aayate Aysi Hai Ki Jin Ke Padhne Ya Sunne Se Padhne Wale Aur Sunne Wale Dono Par Sajda Karna Wajib Ho Jata Hai Isko Sajda-e-Tilawat Kehte Hai.

      [ 📗Durr-ul-Mukhtaar, Kitab-ul-Salaat, Baab: Sujood-ul-Tilawat, Jild: 2, Safa: 694-695]

      • Sajda-e-Tilawat Ka Tareeqa

      ⏩ Sajda-e-Tilawat Ka Tareeqa Yeh Hai Ki Qibla Rukh Khade Ho Kar “Allahu Akbar” Kahta Huwa Sajde Me Jaye Aur Kam Se Kam Teen³ Baar “Subhana Rabbi’al Aalaa” Kahe Fir “Allahu Akbar” Kehta Huwa Khada Ho Jaye Bas, Na Isme “Allahu Akbar” Kehte Huwe Hath Uthana Hai, Na Isme Tashhahud (Attahiyaat) Hai Na Salam.

      [ 📕Durr-ul-Mukhtaar, Kitab-ul-Salaat, Baab: Sujood-ul-Tilawat, Jild: 2, Safa: 699-700]                                                                             [ 📘Fatawa Al Hindiya (Alamgiri), Jild: 1, Safa: 135]                                                                   [ 📗Tanvir-ul-Absar M’aa Durr-ul-Mukhtaar, Jild: 2, Safa: 580]                               [ 📙Bahare Shariyat, Jild: 1, Safa: 731]

      ⏩ Aayat-e-Sajda Padhne Ya Sunne Se Sajda Wajib Ho Jata Hai. Padhne Me Ye Shart Hai Ki Itni Aawaaz Me Ho Ki Agar Koi Uzr Na Ho To Khud Sun Sake, Sunne Wale Ke Liye Yeh Zaruri Nahi Ki Bil Qasd Suni Ho Ya Bila Qasd, Sunne Se Bhi Sajda Wajib Ho Jata Hai.

      [ 📕Fatawa Alamgiri, Jild: 01, Safa: 132]         [ 📗Bahare Shariyat, Jild: 01, Safa: 728]

      ⏩ Kisi Bhi Zaban Me Aayat Ka Tarjama Padhne Aur Sunne Wale Par Sajda Wajib Ho Gaya, Sunne Wale Ne Yeh Samjha Ho Ya Na Samjha Ho Ki Aayat-e-Sajda Ka Tarjama Hai. 

      Albatta Yeh Zaruri Hai Ki Usey Na Maloom Ho To Bata Diya Gaya Ho Ki Yeh Aayat-e-Sajda Ka Tarjama Tha Aur Aayat Padi Gayi Ho To Iski Zarurat Nahi Ki Sunne Wale Ko Aayat-e-Sajda Hona Bataya Gaya Ho.

      [ 📙Fatawa Alamgiri, Jild: 01, Safa: 133]

      ⏩Sajda Wajib Hone Ke Liye Poori Aayat Padhna Zaruri Hai Lekin Baaz Ulama-e-Mut’akhikhareen (Rahimahumullah-ul-Mubeen) Ke Nazdeek Woh Lafz Jis Me Sajde Ka Madda (Root Word) Paya Jata Hai Uske Sath Qabl Ya Baad Ka Koi Lafz Mila Kar Padha To Sajda-e-Tilawat Wajib Ho Jata Hai Lihaza Ahtiyaat Yehi Hai Ki Dono Surto Me Sajda-e-Tilawat Kiya Jaye.

      [ 📘Fatawa Razwiyya, Jild: 08, Safa: 223, 233]

      ⏩Agar Aayat-e-Sajda Namaz Ke Bahar Padi To Fouran Hi Sajda Kar Lena Wajib Nahi Hai Haa Behtar Yehi Hai Ki Fouran Hi Karle Aur Wazu Ho To Der Karni Makhrooh-e-Tanzihi Hai.

      [ 📕Durr-ul-Mukhtaar, Jild: 02, Safa: 703]

      ⏩ Agar Sajde Ki Aayat Namaz Me Padi Hai To Fouran Hi Sajda Karna Wajib Hai Agar Teen³ Aayat Padhne Ki Miqdaar Me Der Laga Di To Gunehgaar Hoga Aur Agar Namaz Me Sajde Ki Aayat Padte Hi Fouran Ruku Me Chala Gaya Aur Ruku Ke Baad Namaz Ke Dono Sajdo Ko Kar Liya To Agarche Tilawat Ki Niyyat Na Ki Ho Magar Sajda-e-Tilawat Ada Ho Jayega.

      [ 📗Durr-ul-Mukhtaar, Jild: 02, Safa: 805]

      ⏩ Namaz Me Aayat-e-Sajda Padi To Iska Sajda Namaz Hi Me Wajib Hai Namaz Ke Bahar Yeh Sajda Ada Nahi Ho Sakta.

      [ 📙Durr-ul-Mukhtaar, Jild: 02, Safa: 705]   [ 📘Fatawa Alamgiri, Jild: 01, Safa: 134]

      ​Allah Ta’ala Humey Ilm-e-Deen Sikhne Aur Uspar Amal Karne Ki Toufeeq De. Imaan Par Zindagi De Aur Imaan Par Hi Khatma Bil Khair Farmaye. Pyare Mustafa Se Sacchi Pakki Mohabbat Karne Ki Toufeeq De Aur Aaqa Ki Sunnat Par Amal Karne Ki Toufeeq De. Duniya Ke Tamam Musalmano Ki Izzat Wa Aabru Jaan Wa Maal Ki Hifazat Farmaye. (Allahumma Ameen)