Posted in Muqashafatul Quloob

Baab: 02 — Khouf-e-Ilahi

Baab : 02

Khouf-e-Ilahi

Faqeeh Abullais Nasr Bin Mohammad Samarqandi (Rehmatullah Alaihi – Mutwaffa San 375 Hijri) Kehte Hai Ki Satwe (7we) Aasmaan Par Allah Ke Ayse Firishtey Hai Ki Unhe Allah Ta’ala Ne Jab Se Paida Kiya Hai, Barabar Sajde Me Hai Aur Allah Ta’ala Ke Azaab Se Intihayi Khoufzada Hai. Qiyamat Ke Din Jab Woh Sajde Se Sar Uthaynge To Kahenge :

🔹“Ay Allah Tu Paak Hai, Hum Teri Kamaa Haqquhoo Ibaadat Nahi Kar Sake.”

📝 Note : Yeh Aayat-e-Sajda Hai Aur Aayat-e-Sajda Padhne Ya Sunne Se Sajda Wajib Ho Jata Hai (Ziyada Malumaat Ke Liye Click Kare Sajda-e-Tilawat Ki Fazeelat Aur Ahkam) Khwah Sunna Ya Padhna Bil Qasd Ho Ya Bila Qasd Aur Isi Tarah Tarjame Ka Hukum Hai.
Farmane Ilahi Hai :

🔸“Woh Firishtey Apne Rab Se Darte Hai Aur Jis Cheez Ka Unhe Hukum Diya Gaya Hai Wohi Karte Hai Aur Ek Lamha Bhi Meri Na Farmani Me Nahi Guzaarte.”

[ 📙Al Quran, Para: 14, Surah Al Nahl, Aayat: 50]

Rasool-e-Akram (Sallallahu Alaihi Wasallam) Ne Irshad Farmaya :

🔹“Jab Koi Banda Khouf-e-Ilahi Se Kaapnta Hai To Uske Gunah Uske Badan Se Ayse Jhad Jate Hai Jaise Darakht Ko Hilane Se Uske Patte Jhad Jate Hai.”

[ 📘Sh’uab-ul-Imaan, Baab: Fi Al Khouf Min Allah Ta’ala, Jild: 1, Safa: 491, Hadees: 803]

🔰 Hiqayat—

🔷 Ek Noujawaan Ek Aurat Ki Mohabbat Me Mubtala Ho Gaya, Woh Aurat Kisi Kafile Ke Sath Bahar Ke Safar Par Rawana Ho Gayi, Jawaan Ko Jab Maloom Huwa To Woh Bhi Kafile Ke Sath Chal Pada. Jab Kafila Jangal Me Pahucha To Raat Ho Gayi, Raat Ko Unhone Wahi Padaw (Ruka) Kiya, Jab Sab Log Soo Gaye To Woh Noujawaan Chupke Se Us Aurat Ke Paas Pahucha Aur Kehne Laga : “Me Tujh Se Be-Intihaa Mohabbat Karta Hu Aur Isiliye Me Kafile Ke Sath Aa Raha Hu.”

🔸 Aurat Boli : “Ja Kar Dekho Koi Jaag To Nahi Raha Hai ?

Jawaan Ne Farte Masrrat Se Saare Kafile Ka Chakkar Lagaya Aur Wapas Aakar Kehne Laga Ki Sab Log Gafil Padey Soo Rahe Hai.

🔹 Aurat Ne Pucha : “Allah Ta’ala Ke Bare Me Tera Kya Khayal Hai ? Kya Woh Bhi Soo Raha Hai ! ”

🔸 Jawaan Bola : “Allah To Na Kabhi Sota Hai Aur Na Hi Usey Oongh Aati Hai”

🔹 Tab Aurat Boli : “Log Soo Gaye To Kya Huwa ! Allah Ta’ala To Jaag Raha Hai, Humey Dekh Raha Hai, Ussey Darna Hum Par Farz Hai.

🔶 Jawaan Ne Junhi Yeh Baat Suni, Khouf-e-Khuda Se Laraz Gaya Aur Bure Irade Se Ta’eeb Ho Kar Ghar Wapas Chala Gaya. Kehte Hai Ki Jab Woh Jawaab Mara To Kisi Ne Usey Khuwab Me Dekh Kar Pucha : “Sunow ! Kya Guzri ?”

🔸 Jawaan Ne Jawab Diya : “Me Ne Allah Ta’ala Ke Khouf Se Ek Gunah Ko Chhoda Tha, Allah Ta’ala Ne Isi Sabab Se Mere Tamam Gunaho Ko Bakhsh Diya” 

🔰 Hiqayat—

🔷 “Majma’ool Lata’eef” Me Hai Ki Bani-Israil Me Ek Kaseer-ul-Iyaal Aabid Tha, Usey Tangdasti Ne Gher Liya, Jab Bahoot Pareshan Huwa To Apni Aurat Se Kaha Jao ! Kisi Se Kuch Mang Kar Lao. Aurat Ne Ek Tajir Ke Yaha Ja Kar Khane Ka Suwal Kiya (Bheekh Manga).

🔸 Tajir Ne Kaha : “Agar Tum Meri Aarzoo Poori Kardo To Jo Chaho Le Sakti Ho”

🔷 Aurat Bichari Chup Chaap Khali Hath Ghar Lout Aayi. Baccho Ne Jab Maa Ko Khali Hath Aatey Dekha To Bhook Se Chillane Lage Aur Kehne Lage :
“Ammi ! Hum Bhook Se Mar Rahe Hai Humey Kuch Khane Ko Do”

🔶 Aurat Dobara Usi Tajir Ke Ha Lout Gayi Aur Khane Ka Suwal Kiya, Tajir Ne Fir Wohi Baat Ki Jo Pehle Kah Chuka Tha. Aurat Razamand Ho Gayi Magar Jab Yeh Dono Takhliyya Me Pahuche To Aurat Khouf Se Kapne Lagi,
🔹 Tajir Ne Pucha : “Kis Se Darti Ho ?”

🔸 Usne (Aurat Ne) Kaha : “Me Us Rabbe Lam-Yazal (Allah Ta’ala) Ke Khouf Se Larza Hu Jisne Humey Paida Kiya”

🔷Tab Tajir Bola Jab Tum Itni Tangdasti Aur Usrat Me Bhi Khouf-e-Khuda Rakhti Ho To Mujhe Bhi Allah Ke Azaab Se Darna Chahiye, Yeh Kaha Aur Aurat Ko Bahoot Sa Malo Maal Dekar Izzat Ke Sath Rukhsat Kar Diya.

🔶 Allah Ta’ala Ne Paigambar-e-Waqt Musa (Alaihissalam) Par Wahi Bheji Ke Fula Bin Fula Ke Paas Jao Aur Usey Mera Salam Kah Do Aur Kehna Ki Me Ne Uske Tamam Gunah Mu’aaf Kar Diya Hai. Musa (Alaihissalam) Hasbe Hukum-e-Ilahi Us Tajir Ke Paas Aaye Aur Pucha :

🔹”Kya Tum Ne Koi Azeem Neki Anjam Di Hai Jiski Wajah Se Allah Ta’ala Ne Tumhare Tamam Gunaho Ko Mu’aaf Kar Diya Hai.” Jawab Me Tajir Ne Mazkoora-e-Waqi’aa Sunaya.

Huzoor Nabi-e-Kareem (Sallallahu Alaihi Wasallam) Farmate Hai :

🔸“Farman-e-Ilahi Hai- Me Apne Kisi Bande Par Do² Khouf Aur Do² Aman Jam’aa Nahi Karta, Jo Shakhs Dunya Me Mere Azaab Se Darta Hai Me Usey Aakhirat Me Be-Khouf Kar Dunga Lekin Jo Dunya Me Mere Azaab Se Be-Khouf Rehta Hai, Me Usey Aakhirat Me Khouf-Zada Karunga”.

[ 📘Sha’ab-ul-Imaan, Al Haadi Ashar Min Sha’ab-ul-Imaan, Baab: Fi Al-Khouf Min Allah Ta’ala, Jild: 1, Safa: 482, Hadees: 777]

Allah Ta’ala Ka Irshad Hai :

🔹“Tum Logo Se Nahi, Mujh Se Daro”

[ 📕Al Quran, Surah Al Maidah, Para: 6, Aayat: 44]

Ek Aur Aayat Me Hai :

🔸“Agar Tum Momin Ho To Logo Se Nahi, Mujh Se Daro”

[ 📗Al Quran, Surah Al-Imran, Para: 4, Aayat: 175]

🔰 Hazrate Umar (RadiAllah Anhu) Aur Khashiyyat-e-Ilahi—

▶ Hazrate Umar (RadiAllah Anhu) Jab Quran Majeed Ki Koi Aayat Sunte To Khouf Se Behosh Ho Jate, Ek Din Ek Tinka Hath Me Lekar Kaha :

🔸“Kaash ! Me Ek Tinka Hota Hai ! Koi Qabil-e-Zikr Cheez Na Hota ! Kaash Mujhe Meri Maa Na Janti ! Aur Khouf-e-Khuda Se Aap Itna Roya Karte The Ki Aap Ke Chehre Par Aasu’o Ke Behne Ki Wajah Se Do² Siyah Nishaan Padh Gaye The.

[ 📘Ihya-ul-Uloom, Jild: 04, Safa: 226]

Huzoor Nabi-e-Kareem (Sallallahu Alaihi Wasallam) Ne Farmaya :

🔹“Jo Shakhs Khouf-e-Khuda Se Rota Hai Woh Jahannum Me Hargiz Dakhil Nahi Hoga Isi Tarah Jaisa Ki Doodh Apne Thano Me Nahi Jata”.

[ 📕Sunan Tirmizi, Fazail-lul-Jihaad, Jild: 3, Safa: 236, Hadees: 1639]

🔶 “Daqa’eekul Akhbaar” Me Hai Ki Qiyamat Ke Din Ek Shakhs Ko Laya Jayega, Jab Uske Aamaal Tole Jaynge To Buraiyo Ka Palda Bhari Ho Jayega, Chunanchey Usey Jahannum Me Dalne Ka Hukum Milega, Us Waqt Uski Palko Ka Ek Baal Allah Ta’ala Ki Bargah Me Arz Karega Ki Ay Rabbul Zul Jalaal ! Tere Rasool Ne Farmaya Tha Jo Allah Ta’ala Ke Khouf Se Rota Hai Allah Ta’ala Uspar Jahannum Ki Aag Haraam Kar Deta Hai Aur Me Tere Khouf Se Roya Tha.

🔷 Allah Ta’ala Ka Daryaa-e-Rehmat Josh Me Aayega Aur Us Shakhs Ko Ek Ashakbaar Baal Ke Badle Jahannum Se Bacha Liya Jayega, Us Waqt Hazrate Jibrail (Alaihissalam) Pukarenge :

🔸“Fula Bin Fula Ek Baal Ke Badle Najaat Pa Gaya”

🔷 “Bidayatul Hidaya” Me Hai Ki Qiyamat Ke Din Jab Jahannum Ko Laya Jayega To Us Se Haibatnaak Aawaze Niklengi Jis Ki Wajah Se Log Us Par Se Guzarne Me Ghabraynge,

Farman-e-Ilahi Hai :

🔸“Aur Tum Har Guroh Ko Dekhoge Zaanu Ke Bal Gire Huwe Har Guroh Apne Naam-e-Aamal Ki Taraf Bulaya Jayega”

[ 📗Al Quran, Surah Al Jasiya, Para: 25, Aayat: 28 ]

🔷 Jab Log Jahannum Ke Kareeb Aaynge To Issey Sakht Garmi Aur Khouf-Naak Aawaze Sunenge Jo 500 Saal Ke Safar Ki Doori Se Sunayi Deti Hogi, Jab Har Nabi Nafsi Nafsi Aur Huzoor (Sallallahu Alaihi Wasallam) Ummati Ummati Keh Rahe Honge Us Waqt Jahannum Se Ek Nihayat Hi Buland Aag Bahar Niklegi Aur Huzoor (Sallallahu Alaihi Wasallam) Ki Ummat Ki Taraf Badegi, Aap Ki Ummat Uski Mudafa’at Me Kahegi :

🔸“Ay Aag ! Tujhe Namaziyo, Sadka Dene Walo, Rozadaro Aur Khouf-e-Khuda Rakhne Walo Ka Wasita, Wapas Chali Jaa !”

🔷 Magar Aag Barabar Badti Chali Jaygi, Tab Hazrate Jibrail (Alaihissalam) Yeh Kehte Huwe Ki Jahannum Ki Aag Ummat-e-Mohammad (Sallallahu Alaihi Wasallam) Ki Taraf Badh Rahi Hai, Aap Ki Khidmat Me Pani Ka Ek Piyala Pesh Karenge Aur Arz Karenge :

🔸“Ay Allah Ke Nabi ! Issey Aag Par Cheentey Mariye.”

🔷 Aap Aag Par Cheentey Marenge To Woh Aag Fouran Bujh Jaygi, Us Waqt Aap (Sallallahu Alaihi Wasallam) Jibrail (Alaihissalam) Se Us Pani Ke Muta’allik Puchenge. Jibrail (Alaihissalam) Kehenge :
🔸“Huzoor ! Yeh Khouf-e-Khuda Se Rone Wale Aap Ke Gunahgaar Ummatiyo Ke Aanso The, Mujhe Hukum Diya Gaya Ki Me Yeh Pani Aap Ki Khidmat Me Pesh Karu Aur Aap Issey Jahannum Ki Aag Bujha De”.
[ 📘Roohul Bayan, Al Aa’raf,  Tahat-ul-Aayat, Jild: 3, Safa: 285]

Huzoor (Sallallahu Alaihi Wasallam) Dua Manga Karte The :

🔹“Ay Allah ! Mujhe Aysi Aankhe Ata Farma Jo Tere Khouf Se Rone Wali Ho”

[ 📙Jam’aa-ul-Hadees, Jild: 6, Safa: 115, Hadees: 4823]

Hadees Shareef Me Hai :

🔹“Koi Aysa Banda-e-Momin Nahi Jis Ki Aankho Se Khouf-e-Khuda Se Makhkhi Ke Par Ke Barabar Aanso Bahe Aur Uski Garmi Uske Chehre Par Pahuche Aur Usey Kabhi Jahannum Ki Aag Choo’aygi”.

[ 📘Ibne Majah, Jild: 4, Safa: 467, Hadees: 4197]

🔶 Har Momin Ke Liye Zaruri Hai Ki Woh Aazab-e-Ilahi Se Darta Rahe Aur Apne Aapko Khawahishaate Nafsani Se Rokta Rahe,

Farman-e-Ilahi Hai :

🔹“Pas Jis Ne Nafarmani Ki Aur Dunya Ki Zindagi Ko Sab Kuch Jana Uska Thikana Jahannum Hai Aur Jo Apne Rab Ke Samne (Khade Rehne) Maqaam Se Dara Aur Apne Nafs Ko Khawahishaat Se Rok Diya To Usko Panahgaah Jannat Hai”.

[ 📕Al Quran, Surah Nazi’at,  Para: 30, Aayat: 37-41]

🔶 Jo Insan Aazab-e-Ilahi Se Bachna Chahe Aur Sawab Wa Rehmat Ka Ummeedwaar Ho, Usey Chahiye Ki Dunyawi Masa’eeb Par Sabr Kare, Allah Ki Ibaadat Karta Rahe Aur Gunaho Se Bachta Rahe. 

🔶 “Zahar-Rul-Riyaaz” Me Ek Hadees Hai Ki Jab Jannati Jannat Me Dakhil Honge To Farishtey Unke Samne Tarah Tarah Ki Ne’amate Pesh Karenge, Unke Liye Farsh Bichaynge, Mimber Rakhe Jaynge Aur Unhe Mukhtalif Qism Ke Khane Aur Fal Pesh Kiye Jaynge, Us Waqt Jannati Hairan Baithe Honge.

🔹 Allah Ta’ala Farmayega : “Ay Mere Bando ! Hairan Kyu Ho ? Yeh Bihisht Jaye Hairat Nahi Hai”

🔸 Us Waqt Momin Arz Karega : “Baare Ilahi ! Too Ne Ek Wada Kiya Tha Jiska Waqt Aa Pahucha Hai”

🔷 Tab Farishto Ko Hukum Hoga Inke Chehro Se Parda Utha Lo!

🔸 Farishtey Arz Karenge : “Ye Tera Deedar Kaise Karenge Halanki Yeh Gunehgaar The.”

🔹 Us Dam Farman-e-Ilahi Hoga : “Tum Hijab Utha Do ! Yeh Zikr Karne Wale, Sajda Karne Wale Aur Mere Khouf Se Rone Wale The Aur Mere Deedar Ke Ummeedwaar The.

🔶 Us Waqt Parda Utha Diye Jaynge Aur Jannati Allah Ka Deedar Hote Hi Sajde Me Gir Jaynge.

🔹 Farman-e-Ilahi Hoga : Sar Utha Lo Yeh Jannat Daar-e-Amal Nahi Daar-e-Jaza Hai”

Aur Wo Apne Rab Ko Be Kaif Dekhenge.

🔸 Rab Farmayega : “Mere Bando ! Tum Par Salamati Ho, Me Tumse Razi Hu Kya Tum Mujh Se Razi Ho ?

🔹 Jannati Arz Karenge : “Ay Hamare Rab ! Hum Kaise Razi Na Honge Halanki Tu Ne Humey Wo Ne’amate Di Jinhe Na Kisi Aankh Ne Dekha, Na Kisi Kaan Ne Suna Aur Na Hi Kisi Dil Me Inka Tasawwur Guzra.”

🔶 Aur Yehi Farman-e-Ilahi Ka Maqsood Hai Ki Allah Unse Razi Huwa Aur Woh Allah Se Razi Huwe (Jaisa Ki Ye Quran Me Irshad Huwa)

🔹“Un Par Salaam Hoga Meharban Rab Ka Farmaya Huwa”

[ 📗Al Quran, Surah Ya’Seen, Para: 23, Aayat: 58]

[ 📕Mukashafat-ul-Quloob, Baab no°: 2, Baab: Khouf-e-Ilahi, Safa: 35-39, Maktabatul Madina Delhi]

Advertisements
Posted in Muqashafatul Quloob

Baab : 01 — Khouf-o-Khashiyyat

Baab : 01

Baab : Khouf-o-Khashiyyat
Aaqa-e-Naamdaar (Sallallahu Alaihi Wasallam) Ne Farmaya :


🔸”Allah Tabarak Wa Ta’ala  Ne Ek Firishta Paida Kiya Jiske Dono² Bazu’oo Ka Darmiyani Fasila Mashriko Magrib Ko Ghere Huwe Hai, Uska Sar Zere Arsh Hai Aur Dono² Pao Tahtussara Me Hai, Roo-e-Zameen Par Aabaad Khalq Ke Barabar Uske Par Hai, Meri Ummat Me Se Jab Koi Mard Ya Aurat Mujh Par Durood Bhejta Hai To Us Firishtey Ko Izn-e-Ilahi Hota Hai Ki Woh Arsh Ke Neeche Bahar-e-Noor Me Goutazan Ho To Woh Gouta Lagata Hai, Jab Bahar Nikal Kar Woh Apne Bazu (Par) Jhadta Hai To Uske Paro Se Qatraat Tapakte Hai. Zaat-e-Baari Ta’ala Har Qatre Se Ek Firishta Paida Karti Hai Jo Qiyamat Tak Uske Liye Dua-e-Magfirat Karta Hai.
🔹Ek Dana Ka Qoul Hai Ki Jism Ki Salamati Kam Khane Me Hai Aur Rooh Ki Baqaa Kam Gunaho Me Hai Aur Imaan Ki Salamati Huzoor Nabi-e-Kareem, Raoofurraheem (Sallallahu Alaihi Wasallam) Par Salato Salaam Padhne Me Hai.
Irshad-e-Khudawandi Hai :


🔹”Ay Imaan Walo Allah Se Daro”

[ 📕Al Quran, Surah Al Hashr, Para: 28, Ayat: 18]
Yani Qalb Me Khouf-e-Khuda Paida Karo Aur Uski Itaa’at Wa Farma Bardari Karo.
🔸”Aur Insan Dekhe Ki Aayinda Ke Liye Kya Bheja”

[ 📘Al Quran, Surah Al Hashr, Para: 28, Ayat: 18]
Matlab Ye Hai Ki Roz-e-Jazaa Ke Liye Kya Amal Kiya. Mafhoom Iska Yah Hai Ki Sadqa Karo Aur Aamaal-e-Saliha Karo Taki Rust-Khaiz Ke Din (Qiyamat Ke Din) In Ka Ajr Paao Aur Apne Rab Se Darte Raho, Allah Ta’ala Tumhari Har Acchi Aur Buri Baat Ko Janta Hai.
▶ Qiyamat Ke Din Firishtey, Zameen, falak, Rozo Shab Tamam Gawahi Denge Ki Aadam Zaade (Insan) Ne Yeh Kaam Bhalai Ka Kiya Ya Burayi Ka, Itaa’at Wa Tabe’adari Ki Ya Nafarmani Hatta Ki Insan Ke Apne Aa’za (Body Parts) Bhi Uske Khilaaf Gawahi Denge, Imandaar Aut Muttaqi Wa Parhezgaar Insan Ke Haq Me Zameen Gawahi Degi Chunanchey Zameen Yu Kahegi :
🔹Is Insan Ne Meri Peeth Par Namaz Padi, Roza Rakha, Hajj Kiya, Jihaad Kiya.
▶ Yeh Sun Kar Zahid Wa Muttaqi Shakhs Shaada Wa Farhaa Hoga Aur Kafir Wa Nafarmaan Ke Khilaaf Zameen Gawahi Dete Yu Kahegi :
🔸Isne Meri Peeth Par Shirk Kiya, Zina Kiya, Sharaab Pi Aur Haraam Khaya Ab Iske Liye Halakat Wa Barbadi Hai, Agar Arahamurrahimeen (Allah Ta’ala) Ne Is Par Kada Muhasba (Hisaab Wa Kitaab) Kiya.

🔰 7 Baato Me Allah Ta’ala Ke Khouf Ka Pata Chalta Hai
➡ Sahib-e-Imaan Woh Hai Jo Jism Ke Tamam Aa’za Ke Sath Allah Ta’ala Se Dar Rakhta Ho Jaisa Ki Faqeeh Abullais Nasr Bin Mohammad Samarqandi (Rehmatullah Alaihi – Mutwaffa San 375 Hijri) Ne Farmaya :

 7 Baato Me Allah Ta’ala Ke Khouf Ka Pata Chalta Hai :

(1) Uski Zaban Galat Bayani, Geebat, Chugli, Tohmat Aur Fuzool Bolne Se Bachi Ho Aur Allah Ta’ala Ka Zikr Karne, Tilawat-e-Kalaam-e-Paak Karne Aur Deeni Uloom Sikhne Me Lagi Ho.
(2) Uske Dil Se Adawat, Bohtaan Aur Musalman Bhaiyo Ka Hasad Nikal Jaye Kyuki Hasad Nekiyo Ko Chaat Jata Hai Jaisa Ki Farmane Mustafawi Hai :
🔹”Hasad Nekiyo Ko Khaa Jata Hai Jaise Aagh Lakdi Ko Khaa Jati Hai”

[ 📙Ibne Majah, Kitab-ul-Zahad, Baab Al Hasab, Jild: 4, Safa: 473, Hadees: 4210]
Janna Chahiye Ki Hasad Dil Ki Razeel Tareen (Intihayi Buri) Bimariyo Me Se Ek Bimari Hai Aur Dil Ki Bimariyo Ka Darma Sirf Ilm-o-Amal Se Hi Ho Sakta Hai.
(3) Uski Nazr Haraam Khane-Peene Se Aur Haraam Libaas Wagairah Se Mahfooz Rahe Aur Duniya Ki Taraf Lalach Nazr Se Na Dekhe Balki Sirf Ibrat Pakadne Ke Liye Uski Taraf Dekhe Aur Haraam Par To Kabhi Uski Nigaah Na Pade Jaisa Ki Nabi-e-Kareem (Sallallahu Alaihi Wasallam) Ne Farmaya :

🔸Jisne Apni Aankh Haraam Se Bhari Allah Ta’ala Roz-e-Qiyamat Uski Aankh Ko Aagh Se Bhar Dega.

[ 📘Tazkir-Tul-Muzu’aat-Lil Fatni, Safa: 182]
(4) Uske Pet Me Haraam Giza Na Jaye, Yeh Gunah-e-Kabeera Hai, Huzoor Nabi-e-Kareem (Sallallahu Alaihi Wasallam) Ne Farmaya :

🔹”Bani-Aadam Ke Pet Me Jab Haraam Ka Luqma Padta To Zameen Aasmaan Ka Har Firishta Us Par Lan’at Karega Jab Tak Ki Woh Luqma Uske Pet Me Rahega Aur Isi Halat Me Marega To Us Ka Thikana Jahannum Hoga.
(5) Janib-e-Haram Dastadaraz Na Kare (Haram Ki Taraf Haath Na Badaye) Balki Hattal Maqdoor Uska Hath Itaa’ate Ilahi Ki Taraf Badhe.
🔹”Hazrate Qa’bul Ahbaar (RadiAllah Anhu) Se Riwayat Hai Ki Allah Ta’ala Ne Sabz Moti Ka Mahal Paida Farmaya, Usme 70000 Ghar Hai Aur Har Ghar Me 70000 Kamre Hai, Usme Wohi Dakhil Hoga Jiske Samne Haraam Pesh Kiya Jaye Aur Woh Sirf Khouf-e-Ilahi Ki Wajah Se Usey Chhod De.
(6) Uska Kadam Allah Ta’ala Ki Na-Farmani Me Na Chale Balki Sirf Uski Itaa’at Wa Khushnoodi Me Rahe, Aalimo Aur Neko Ki Taraf Harkat Kare.
(7) Ibaadat Wa Mujaahada, Insan Ko Chahiye Ki Khalis Allah Ta’ala Ke Liye Ibaadat Kare, Riyakari Wa Munafaqat Se Bachta Rahe, Agar Aysa Kiya To Yeh Un Logo Me Shamil Hoga Jinke Muta’allik Irshad-e-Khudawandi Hai :

🔸”Aur Tere Rab Ke Nazdeek Aakhirat Darne Walo Ke Liye Hai”.

[ 📙Al Quran, Al Zukhraf, Para: 25, Aayat: 35]


🔹”Beshaq Muttaqi Aman Wale Maqam Me Honge”.

[ 📗Al Quran, Al Dhukhan, Para: 25, Aayat: 51]
▶ Goya Khudawande Ta’ala Yeh Farma Raha Hai Ki Yehi Log (Muttaqi Wa Parhezgaar) Qiyamat Ke Din Dozakh Se Chutkara Paynge Aur Imaandar Aadmi Ko Chahiye Ki Woh Beem Waha Raza Ke Darmiyan Rahe, Wohi Allah Ta’ala Ki Rehmat Ka Ummeedwar Hoga Aur Us Sey Mayoos Wa Na-Ummeed Nahi Rahega, Allah Ta’ala Ne Farmaya :
🔸”Allah Ta’ala Ki Rehmat Se Na-Ummeed Na Ho”

[ 📕Al Quran, Al Zumar, Para: 24, Aayat: 53]
Pas Allah Ta’ala Ki Ibaadat Kare, Burayi Ke Kamo Se Muh Mod Le Aur Allah Ta’ala Ki Taraf Hamaatan Mutawajjeh Ho. 
[ 📘Mukashafat-ul-Quloob, Baab no°: , Baab:01 Khouf-o-Khashiyyat, Safa: 30-34 Maktabatul Madina Delhi]